“是我太过爱你，愿意放生你。”前奏响起，大家就知道Jade关心妍嚟啦！今年就係佢出道20周年，热爱音乐嘅佢一直希望用音乐嘢嚟帮人；做咗艺人咁耐，原来佢仲有其他身份……被囡囡治愈，视歌迷为动力，今期“关家姐”作客Color，讲咗一个关于“自己放生自己”嘅故事。

　　

　　

　　郭玮/文

　　杰仔、受访者提供/图

　　

　　

　　

　　用音乐治愈你我

　　

　　

　　做咗歌手咁耐，Jade觉得，音乐嘅力量好强大，所以希望用佢嚟帮人。最近佢推出咗全新广东歌大碟《Emergence》，有别于过往擅长嘅惨情歌，呢只专辑讲嘅係一个关于“治愈”嘅故事：源于自己同爸爸的和解，放过佢就等于放过自己。Jade将呢段经历变成七首作品，帮大家疗伤治痛。今次从专辑嘅封面设置，到内页的歌词明信片配图，Jade喺每个细节上落足心机，让每个造型都有唔同嘅含义：面上有光，是说服自己嘅时候；拥抱花花世界，代表嘅係释怀；彻底换个色tone，寓意走出困局……

　　

　　除咗今次嘅治愈系专辑，Jade一直以嚟都有投身公益事业，其中一件好有意义嘅事，就係会为特殊小朋友提供音乐治疗。得闲嗰阵，佢会用教人唱歌嘅收入嚟做善事，用佢一直引以为傲的音乐力量去帮助有需要嘅人、回馈呢个社会。

　　

　　

　　

　　歌手之外新角色

　　

　　

　　过去两年时间受疫情影响，Jade手头上好多工作都被迫延迟。但佢冇得闲过，仲变得越嚟越忙：以前只专注做音乐，依家开始尝试利用网络资源，化身主持人，做更多歌手身份以外嘅事，例如大方share心得、介绍新嘢，手把手教授音乐知识等，都係佢充实嘅日常。跳出曾经嘅舒适圈，Jade发现原来自己喺歌手以外嘅其他身份，都好受大家喜爱。

　　

　　写歌、唱歌係为咗歌迷，咁煮嘢食、整手工，就係佢作为“妈咪”嘅用心了。凡係应承囡囡嘅事，佢一定讲到做到，会落手落脚制作囡囡嘅应节服装，买布裁剪、缝线、起钉收尾，每个步骤都熟记于心。对囡囡嘅悉心照顾，成功令囡囡成为佢嘅fans：要买咗《Emergence》先算係真粉！囡囡真系做到了。

　　

　　

　　

　　感恩有家庭温暖

　　

　　

　　Jade话，每个人内心嘅伤痛都会唔同，嗰啲唔好嘅嘢就好似垃圾咁，需要慢慢清理……佢自细就冇爹地妈咪嘅陪伴，一直要靠幻想嚟弥补童年缺失嘅经历，自从有咗温暖和睦嘅家庭，以及囡囡嘅出世，抚平咗佢过去埋藏心里的伤痛，慢慢被治愈。依家同爸爸嘅矛盾已经解开，佢亦越来越享受温馨嘅家庭生活。对当下嘅生活，家庭嘅warm已经抚平咗过去嘅不如意，Jade表示好感恩，佢觉得暂时乜嘢都好OK。

　　

　　

　　

　　最大收获係Fans

　　

　　

　　大大话话做咗艺人就快20年，Jade话：大家耳熟能详嘅靓歌，同埋一直支持自己嘅fans，係佢嘅最大收获。今次专辑可以话係靠大家“催”出嚟嘅，因为今年就係佢正式出道20周年，新专辑同演唱会都已经喺佢新一年嘅计划清单上。Jade话想趁住自己有精力，多啲开show等同大家见面，为此佢日日都keep住操fit自己嘅状态。新年将至，佢将愿望送俾大家：希望所有人都健康平安！