烦嚣城市容易令人高度紧张，得闲就应该多同大自然做朋友，远眺绿水青山，放松眼球更令心情愉悦。云南大理、浙江丽水呢种山清水秀嘅旅游目的地，好适合慢落嚟enjoy生活，近来有唔少电视剧都中意去呢啲地方取景，大家煲剧嘅时候就好似跟住去旅游咁。电视剧一打开，叮！治愈身心嘅旅行立即启程！

　　

　　郭玮/文 官方海报、剧照/图

 

　　

　　绝美大理 重拾力量

　　

　　

　　作为“神仙姐姐”刘亦菲主演嘅首部现代电视剧，《去有风的地方》自开拍以来就一直受到大家嘅高度关注。靓女刘亦菲搭档俊男李现，本身就够晒睇头，剧集喺云南大理实地取景，细致展示出茶马古道嘅原始风貌、喜洲古镇的青瓦白墙，云苗村的田园马厩，洱海边的诗意生活……每帧画面都好似海报咁吸引，好多网友都话呢部电视剧简直就係“大型辞职去旅行”嘅宣传片。电视剧播出之后，靓景吸引咗好多朋友仔飞过去玩，云南旅游局仲发出感谢信，感谢剧组推动咗当地嘅旅游业，带旺咗当地嘅经济，令更多人爱上云南。其实，电视剧并唔係话鼓励随便辞职或者摆烂，而係希望大家要学会放松，整理好心情，满血复活咁重新出发。

 

 

　　

　　清新丽水 浪漫加码

　　甜美天真嘅虞书欣搭档高冷有型嘅张彬彬，小甜剧《两个人的小森林》为大家放送咗一段令人如沐春风般嘅森系爱情故事。“持靓行凶”嘅乡村美人，邂逅淡薄世俗的型男教授，一个重拾对大自然的爱，另一位就从中搵到爱人的力量，爱意就在两人打打闹闹中慢慢满泻，在靓景嘅中和变得特别甜蜜。电视剧取景浙江丽水，有如“爱丽丝梦游仙境”一般仙气飘飘的香樟水桥，古堰画乡里的天空之镜，环山而行所见嘅溢香茶园，每款景色都值得打卡。拥抱清新嘅大自然，单人游可以洗涤人心，相伴而行又能疗愈彼此。连剧中饰演男主角嘅张彬彬自己都被呢度嘅美景打败，拍完剧之后晒相安利，推荐大家假期去打卡，唔知几多人会被呢波“售后”种草咧？

 

 

 

 

　　养眼田园 疗愈人心

　　从不向生活低头嘅元气靓妹，为人刻苦、上位做咗经理；只活在自己世界嘅腹黑小说家，表面顽固、内里却温柔似火，两人田园相遇，由一起迷惘到回归内心，乍眼睇《何加加的桃花源记》嘅剧情，就好似《去有风的地方》与《两个人的小森林》嘅mix版。呢部电视剧冇流量艺人嘅加持，令观众更容易被优美嘅风景画面吸引。同样取景于浙江丽水，呢部电视剧运镜都係见景不见人，经常拉大景俾长镜头，令人物角色弱化。瓦顶楼房、沿山蜿蜒嘅小楼梯，人物主角则变成山水花草，平静水面浮着小船，翠绿田间小道穿梭着小型摩托，半人高嘅杂草丛中有少女……满屏绿色，舒心养眼，每个镜头都俾人满满嘅治愈感，好似俾眼睛去咗一次旅游，瞬间变得心旷神怡。