状元坊、仰忠汇、大笪地……广州好多风靡一时嘅淘货旺地都陆续消失咗，而开咗廿几年嘅南泰批发市场，虽然面积缩小了，但依然有笋嘢买，仲逆势而上变身大热打卡地，连日用瓷器店、卡通公仔店以及零食食材店都潮到风湿，连“大湾区哥哥”都纷纷嚟打卡！

　　饶禧/文 黄译萱/图 饶禧/模特

　　狂拍“早餐杯墙”

　　靠陶瓷杯碗碟出圈嘅枫艺陶瓷，可乐君已经唔係第一次嚟报道！以前是迷恋佢嘅陶瓷，今次係专门来打卡佢壮观嘅“瓷器墙”！呢度有铺满门口、挂满成墙嘅陶瓷杯碗碟，颜色丰富、款式新颖，最hit嘅就係超colorful嘅 “早餐杯墙”，随手一拍就出片了！虽然都係瓷器成群，但呢度同景德镇唔同嘅係，瓷器偏西式、日式，斋茶杯都超多种选择。有经典IP造型变身嘅茶杯，有睇得唔食得嘅juicy水果杯、仲有超mini嘅猪猪杯……“杯子控“可以逛成日、睇成日，实在无法手下留情。无论杯碗瓢盆，价格会比市面低，价格从个位数到三位数都有，就算零售都可以攞到超抵价！店内仲有迷你冰箱贴，可以同杯碗碟配成一set噶！

　　跌入公仔世界

　　市场中嘅6号居民楼，藏着几间玩具潮牌店，同样係吸引大家嚟打卡嘅所在！一出电梯口，就喺复古玩具爱好者嘅“圣地” ，门口摆住个大型阿童木，一入门就跌入公仔世界，连夹娃娃机之间都放满玩具公仔，仲可以淘到古着孤品包包和衣服。不过真係想入店一探究竟，需要支付10蚊“门票”。唔想付费嘅朋友可以去对面转角位的另一家店，门口挂满心愿牌，更有昭和风贴图供大家免费影相。店铺虽小但经典卡通公仔品种都好齐全，芝麻街、面包超人、玩具总动员等IP公仔统统可以搵到。同怀旧玩具、手办公仔嚟翻张合照，今期朋友圈又有靓相show啦。

　　迷上“零食天地”

　　批发市场内嘅“零食天地”片区，可以揾到来自全世界嘅零食和食材，价格一样係好实惠，随便入手，荷包唔会叫救命！每家店都会有一面密密麻麻嘅零食墙，展示店内各式各样的零食，每次嚟到有新发现，令人睇到心喐喐！你会又见返童年时候嘅小零食，因为小卖部、士多都喺嚟呢度入货嘅。除咗零食，呢度仲係“厨神们”嘅进货地，调味用嘅罐头、烘焙用嘅奶油等食材，呢度都会提供唔同牌子、唔同产地嘅多样选择，连烘焙嘅模具都一应俱全，无论厨房小白还是烘焙达人，都会被这里迷住。呢次可乐君就搵到整蛋糕用嘅奥利奥碎和阿华田碎，实现朱古力蛋糕自由啦！