《逆天奇案2》大结局中“唐冠峰”反转，牺牲自己救全局嘅拆弹行动，成就咗全剧嘅大团圆结局。饰演呢个角色嘅“小方”方力申最近就上咗Color手作坊玩，讲起自己眼中嘅“唐教授”。放低“教授”嘅身份，小方仲有歌手、运动员、主持等多个身份，唔知大家最冧边个咧。

　　郭玮/文  受访者提供、秦丽莹/图

　　演戏最有feel

　　小方话对自己拍过嘅剧集，都会谂起拍摄当时嘅情景。讲起“唐冠峰”，小方话印象最深刻嘅，係呢个角色喺逃避警方追捕，耍手段掩人耳目溜走嘅嗰一幕：氹啲学生帮手、换衫变装等一系列动作，行云流水毫不拖沓，似係蓄谋已久，更似胸有成竹的一番操作，令观众都感慨呢个角色嘅聪明才智。呢种感觉同喺运动场上瞬间嘅热血，或者演唱会舞台上刹那的感动唔同 ，所以喺运动员、主持、歌手等众多身份之中，佢会选择做演员，喺不断回味过去场景嘅同时，改进自己、不断进步。小方话自己好想尝试下拍喜剧，因为自己都係个活泼好动嘅人，想尝试演绎多啲唔同嘅风格。

　　跟住前辈揾方向

　　小方曾经係一个专业嘅游泳运动员，打破过香港泳坛多个纪录。前段时间，再次投身游泳比赛嘅小方，更取得自己近几年来最好嘅成绩。作为运动员，小方对自己所擅长嘅项目好自信。但初入娱乐圈，嚟到呢个灯红酒绿嘅花花世界，佢因为内敛、陌生而经常寡言少语。参加《美女厨房》见到前辈们自信嘅谈吐，小方被佢哋嘅魅力深深吸引，受大家启发同引导之后，佢意识到作为公众人物，娱乐他人就係自己嘅职责。后面佢就慢慢开始放开自己，同大家打成一片，成为人见人爱嘅“飞鱼王子”啦。小方仲透露，7月佢会赴巴黎参与奥运会嘅报道，虽然唔係参赛嘅运动员，但都会係一次非常好嘅体验。

　　不断挑战自己

　　《逆天奇案2》大结局后，小方开始准备自己嘅个人音乐会。时隔多年，再企喺完全属于自己嘅舞台上，佢觉得既紧张又兴奋。咁耐冇见，小方觉得畀大家啲惊喜创新，係好有必要嘅，“回忆杀”歌单必不可少，至于万众期待嘅露腹肌，佢就应承话，有嘅话绝对唔会吝啬收埋啦。入行做艺人之后，小方都keep住练游水、做运动，随时保持自己嘅好状态，but佢坦言自己唔会攞以前嘅成绩嚟比较，而係挑战依家嘅自己，希望做得更好。同可乐君·牛牛一起喺Color手作坊制作石膏画，临拍结尾镜头之前，小方都争取补多两个颜色：“咁就可以多啲颜色，再完美啲、再靓啲！”小方觉得自己依家仲未做到最好，调侃自己话“一直喺度冲刺，但仲未冲线。”