AP潘宇谦前段时间推出新歌《想和你》，甜甜嘅节奏加上暖暖的歌词，爱意满泻浪漫至极。趁住春暖花开，Color君同AP去老城区嚟咗趟老派约会，公园散步倾计、老街shopping吃喝、小区散漫放空，悠闲自在令人回味。

　　郭玮/文 黄译萱/图 郭玮/模特

　　公园邂逅过去

　　广州人民公园位于传统中轴线上，所以又叫做“中央公园”。园内有好多参天古树，见证着呢个公园过百年嘅历史变迁。树荫下嘅小道舒适安静，花坛边嘅石板凳适合乘凉，呢边有阿姨叔叔捉棋唱歌，嗰边又有手抱孩童牙牙学语，小情侣卿卿我我，闺蜜坐埋耳语聊天，一家人共聚天伦，日常嘅生活场景令成个公园充满生命力。听雀仔叫，心情即刻放松，闻住清淡嘅花香、青草味，讲绵绵情话，或者拉住手仔回味美好嘅往事，简单甜蜜嘅老派约会，呢啲伎俩似乎永不过时。揾个风和日丽嘅午后，同另一半去公园date一date，感受呢份浪漫吧。

　　老街见证曾经

　　从公园出嚟，係充满市井味嘅中山六路商业街。喺将军东电器城，你会遇见一啲具有年代感嘅物件，进口电器配件、旧款嘅二手家电、最近hit翻嘅CCD复古相机。这里古着店林立，款式多多，最啱拣翻部相机，同另一半记录恋爱日记。

　　要注意嘅係，古着店内商品大多係二手孤品，选购嘅时候要注意有冇破损或者污渍，带翻屋企之后最好二次清洁再穿着。上世纪30年代红极一时嘅励红百货，行过路过一定要逛逛，时至今日仲可以喺里面闻到记忆中嘅脂粉香味，雪花膏、花露水、电车碱等老国货的味道，承载住婆婆们、妈妈们嘅青春，亦成为现代潮人致青春嘅纪念品。逛完一转中山六路，仿佛时光倒流，在过去的生活场景里面拍拖。

　　宁静回望往昔

　　从热闹嘅中六商业街转个弯，行入小横巷，喺惠吉西收获一份宁静。喺民国时期，呢度闹中取静，係好多富人、华侨偏爱嘅居住地，难怪呢一带嘅建筑风格都係中西合璧嘅，矮洋楼前会有小花园、屋主细心打理嘅小花圃。以前嘅富人区，依家慢慢变成文艺悠闲地。香气四溢嘅café、洋气嘅西式简餐、传统广式糖水老店……每间店各有特色，顾客络绎不绝。店门前放了些桌椅，供人随便歇息，偶尔会有路过嘅小猫同你打招呼或者示好，生活的疲惫即刻被治愈，享受一下悠闲的美好，“充电”完成再开启奋斗模式。