“荔湾胜境”被街坊评为最有“广州味”嘅八景之一。从陈家祠沿旧街行到永庆坊，从沙面跨珠江去到白鹅潭，一条穿街过巷嘅曲线，连成广州人记忆中嘅荔湾印象。今期可乐君就用三个角度带你玩转老西关，感受建筑之美、回忆城市印记、用舌尖品味西关。

　　黄译萱/文   黄译萱、秦丽莹、荔湾区文旅/图

　　一幢幢，移步换景

　　穿过荔湾嘅大街小巷，你会发现呢度其实係广州嘅“建筑博物馆”，从陈家祠嘅雕梁画栋到沙面嘅欧陆风情，每一步都踩喺历史与潮流嘅交织点上。同胡鸿钧一起来到陈家祠，老祖宗以“三雕二塑一铸一画”撑起岭南建筑嘅门面，屋脊屋檐上嘅雕塑，每一处人和物都暗藏惊喜。来西关一定唔可以错过睇西关大屋，喺文物建筑密度超高嘅宝源路尽头，一幢完整嘅西关大屋藏喺荔湾博物馆之中。跨过趟栊门，眼前出现“传三代”嘅老酸枝凳、流光溢彩嘅满洲窗，阁楼仲有西关小姐气派闺房。曾经住过功夫巨星、粤剧名伶嘅永庆坊，经过“修旧如旧”改造，至今仍保留咗一栋栋镬耳屋。穿过“最美骑楼街”恩宁路，去到沙面又係另一番景象。呢度号称“万国建筑博物馆”，漫步喺沙面大街嘅百年古树下，同新古典式、仿哥特式、拱券廊式等风格嘅西洋建筑擦肩而过。转到沙面公园面朝珠江，对面停住一艘通体透亮嘅白色“巨轮”，充满现代感嘅白鹅潭大湾区艺术中心成为新文化地标，开启“荔湾胜境”嘅新篇章。

　　　　陈家祠　　恩宁路　　西关大屋-小姐闺房　　白鹅潭　　沙面大街

　　一段段，城市记忆

　　如果用一条线串联荔湾嘅城市记忆，一段藏喺荔枝湾涌嘅水乡桨声，另一段则藏喺珠江两岸嘅千年商埠记忆。同曹永廉一起寻找广州记忆，第一站係白鹅潭。外国商船变成“艺术巨轮”，大湾艺术中心区金玉满堂，岭南画派墨色见岭南风物，精致嘅非遗工艺赏岭南风情。搭乘白鹅潭到黄沙嘅水上巴士，係荔湾街坊们的集体记忆。上岸后直奔复古出片圣地西堤，去粤海关博物馆，听早晚8点敲响嘅商都钟声；去十三行博物馆，睇曾经“一口通商”嘅繁华。穿过十八甫路来到永庆坊，粤剧艺术博物馆尽显岭南古典园林美学。旁边的非遗街区让你上手体验醒狮、广绣等非遗，传统技艺慢慢融入潮流生活，永庆坊成为集章好去处。来到荔枝湾涌，游船绝对係最佳赏景视角。从文塔旁登船，石桥、民居如走马灯般掠过；下午2点到5点，岸边嘅荔湾大戏台传出粤剧声声；入夜，叠月桥似弯月挂于水面变成“月亮桥”；一路嘅西关景致让人流连忘返。

　　　　荔枝湾涌　　白鹅潭内非遗珍品　　泮塘老龙　　粤海关　　永庆坊

　　一啖啖，老广味道

　　食在广州，等我哋用味蕾记住广府味道。西关有唔少“老字号”茶楼，泮溪酒家係广州三大园林酒家之一，坐上荔湾湖上嘅画舫，食绿茵白兔饺好滋味；白天鹅宾馆嘅玉堂春暖餐厅，从环境、味道到价格，都係“早茶天花板”；陶陶居总店有145年历史，点心却有新潮味。从陈家祠地铁站出发食遍西关小吃，从龙津东路到宝华路，慢慢填满512G嘅胃。龙津东西路上，伍湛记及第粥、超记煲仔饭食到饱，沙湾姜埋奶、开记甜品甜到入心。行到荔枝湾涌旁嘅风水基，呢度摆满鸡仔饼、斋烧鹅、砵仔糕等老西关嘅童年回忆，“泮塘四秀”中马蹄，整成清甜嘅马蹄爽、马蹄糕。恩宁路上辉记肠粉博物馆，可以边睇边食，更啱游客打卡。转到宝华路，陈添记嘅三件套 “艇仔粥、猪肠粉、爽鱼皮” 卖咗40年。呢条诱人嘅珍馐长廊，每一步都踩着“食在广州”韵律中。

　　风水基西关小吃　　陶陶居　　白天鹅宾馆　　泮溪酒家　　早茶