|
|
|
|
|
|
|
|
|
|
|
|
|
|
|
|
|
|
|
|
|
确认过日期，春节长假马上杀到！确认过眼神，又可以开始收利是啦！新年流流，梗係要讲翻两句好意头嘅贺年话，把口甜啲，利是自然都多几封到手！快嚟跟住Color学多几个地道嘅赞美词语，包你利是收到手都软。 陈祉伶/文、图 唐雨箴、崔舒嫣/模特 鸣谢：辰美国际艺术教育 架势 ga3 sei3 “架势”喺普通话中时常用作名词，指姿态、摆出的样子。而喺广东话中，“架势”除咗做名词外，通常多用作形容词，含堂皇、威风、了不起嘅意思。呢个词在不同的语境里会有表达不同的意思，或赞叹，或蔑视，如果不理解透彻乱咁用，好容易造成误会噶。一般喺陈述句或者感叹句甚至疑问句中出现，则多表示褒义；而出现在反问句中一般为带有贬义的嘲讽。 造句：听讲今年嘅花街庙会整得好架势啵！等阵一起去行下？ 沓水 dab6 sêu2 粤语中形容人好有钱，有好多种讲法，“沓水”係比较常用嘅地道讲法。众所周知，广东人喜欢以“水”指代“财”，例如上期同大家讲过嘅“猪笼入水”、“水浸缸瓦铺”等，都係因“以水为财”嘅习惯而延伸出嘅吉祥话。喺呢度，“沓”係作量词，用于指叠起来的纸张或其它薄嘅东西。想象下，如果钱係要以一沓沓来数，数量咪就相当可观咯。 造句：咪睇嗰靓仔日日着人字拖出街，实情几栋楼等收租，不知几沓水！ 磢镜 sang2 géng3 “磢”，係古汉字遗留，《康熙字典》中嘅字义解释为：“用碎瓦、石块等冲刷器物。”磢镜，原指铜镜制作中的最后一道工序，用幼细砂石对镜面进行打磨抛光，后引申指人容颜俊美，照镜嗰阵令到镜子都顿然生辉。如今，多数人更常用“省镜”，其在《广州话方言词典》中释义为“形容女子非常漂亮，不必去照镜子。”虽然释义有出入，不过一样係赞人靓！ 造句：阿花平时素面朝天唔多起 眼，打扮起身又几磢镜啵！ 冷手执个热煎堆 lang5 seo2 zeb1 go3 yid6 jin1 dêu1 煎堆係广东过年必备嘅一种油炸食品，有啲似大size嘅麻团。啱啱出油锅时新鲜滚热，直接触碰好容易焫亲手。炸煎堆嘅人做得热火朝天，手唔够冻攞唔起出炉煎堆，而喺旁边唔使做嘢嘅人，天寒地冻双手冰冷，却能顺利执起煎堆。所以，呢个词用嚟比喻意外捡到便宜或得到好处，近似普通话的“捡到了一个大馅饼”。 造句：执屋竟然喺旧书里搵到张一百蚊，真係冷手执个热煎堆！ 四万噉口 séi3 man6 gem2 heo2 粤语形容“笑”有好多种表达噶，例如“笑骑骑”、“煠熟狗头”就多用于贬义。而“四万噉口”则在褒义嘅语境下使用，因为麻雀“四萬”嘅字形同露齿的笑容相似，所以佢通常係形容人笑容灿烂到露出排牙。其中好多人会容易混淆“噉”同“咁”，其实呢两个字唔同音亦唔同义。噉音同“敢”，有“（像）……似的”之意。咁音同“禁”，意思係这么、那么。 造句：今年公司年终福利超正，个个都好开心，笑到四万噉口。 掂过碌蔗 dim6 guo3 lug1 zé3 “掂”有直、妥当的意思，与“横生枝节”嘅“横”相对。甘蔗作为广东特产、岭南恩物，一直都有甜蜜、节节高等好寓意。甘蔗一碌碌，本身已经好直噶啦，“掂过碌蔗”即话比条蔗仲要直，简直係一切妥当、顺利、非常完美，冇得顶！而呢一句俗语基本可用在各种场合表达最直接嘅美好祝愿，因此成为老广们最钟意挂喺嘴边嘅万能祝福语。 造句：啱先条条题目我都识做，今次考试肯定掂过碌蔗。
