|
|
|
学到老、活到老，Color19岁啦，但我哋依然要从艺人、潮人身上，不断汲取新知识，求新求变，先可以跟上时代嘅脚步。近年唔少香港艺人都番到内地发展，佢哋有人投身影视作品，有人征战综艺，更有人跨界搞新副业……佢哋不断学习、试新嘢，努力令大家见到佢哋全新一面。最近，香港资深演员麦长青、梁琤做客可乐大本营，分享佢哋最近嘅生活、事业点滴。一起嚟睇下前辈们点讲？ 郭玮/文 宋金峪、秦丽莹、受访者提供/图 梁琤：keep住好状态，enjoy新事物 乐观就是靓靓“秘笈” 喺前段时间上线嘅网络大电影《倚天屠龙记之九阳神功》里面，梁琤（Jade）被大家评为“最美灭绝”。佢就冇谂到呢个角色会咁受大家欢迎，因为梁琤自细就喜欢金庸老师嘅作品，能够参演其中，佢已经感到十分荣幸。“打女”呢个身份，佢都十分enjoy同自豪，因为除咗会得到大家对佢功夫嘅认可，仲可以通过表演令更多人了解到中国功夫。好多人都仲记得，Jade曾经饰演过舍己为人嘅“福贵人”，连佢自己都好中意呢个角色。但武打片演得多，突然转channel，对佢嚟讲的确係个挑战啰。梁琤觉得作为演员，要对自己每一个角色都要负责，所以佢时刻都keep住最靓状态，随时迎接挑战。讲起保养秘诀，梁琤可以滔滔不绝，但佢最强调嘅秘诀係乐观。佢话：“其实大家都会有唔顺心嘅时候，乐观啲，个人开心就自然状态好！” 接触新嘢更积极 由香港翻内地已经过咗一段时间，梁琤开始关注时尚。好友饶子怀带佢睇show，又帮佢搭配咗好多靓靓造型，令佢发现咗自己新嘅一面。自言仲喺学习阶段嘅Jade话，佢正在积累关于搭配、造型方面嘅知识，如果有机会都希望可以打造出自己嘅时装品牌：“我希望啲风格可以潮得嚟，所有人都啱着！”虽然平时嘅工作比较忙，梁琤都会忙里偷闲，睇下综艺节目。特别係睇紧《乘风破浪》嘅时候，自己都蠢蠢欲动，但之后佢谦虚地玩笑话，自己可能会将舞蹈跳成打功夫。梁琤始终觉得，人係要不断接触新事物，先会变得积极向上。所以佢建议大家，休息嘅时候唔好完全“躺平”，尝试揾个感兴趣嘅事情，投入学习，可能会有意外收获噶！ 麦长青：予人欢乐，自我增值 尝试“唔同嘅人生” 闯荡娱乐圈近30年，麦包从来都冇谂过要退休。佢觉得无论做唔做艺人，人都係需要不断咁学习嘅。因为入行早，麦包觉得自己对其他行业嘅了解都比较浅薄，所以佢更希望自己可以从不同嘅职业中感受倒“唔同嘅人生”。做搬运、帮人画公仔、尝试宣传策划、甚至开面包铺……麦包与不同行业嘅各类人接触，学习佢哋的思维方式，从而令自己进步。平时得闲嘅时候，麦包会去睇睇民生、科技嘅相关信息，最近连旅游、风景类嘅节目都唔放过，因为足不出户就可以领略更多唔同地方嘅风土人情。2022年下半年，麦包准备同囡囡一起打造一档节目，会係咩内容？大家期待下先啦。 带欢乐俾大家 戏里嘅麦包，係打横嚟行嘅“梁非凡”，係瓹法律罅做坏事嘅“方世雄”，仲係风流倜傥嘅“冯世璋”……戏外，佢不畏高温帮助群众嘅志愿者，仲係同街坊亲切拉家常，举手投足冧死女嘅大好人。麦长青话，无论係奸角定係正派角色，佢都唔会抗拒。因为佢觉得演员嘅价值唔在乎角色好坏，而在于观众嘅投入程度。当观众真係投入到戏剧世界，发自内心去中意或讨厌一个角色嘅时候，证明呢个角色嘅演绎係成功嘅。从参加《超级新星大赛》开始，到参加艺员训练班，再到今时今日嘅成绩，麦包见证住娱乐圈嘅发展，而自己都有一路成长，佢都希望自己可以继续带到欢乐俾大家。
