|
|
|
|
|
|
唔识冧女仔？出动“花”的诱惑实冇错！无论係浪漫嘅玫瑰花，定係大方嘅“随便花”，都可以轻松冧到心仪对象心花怒放。不过唔係每种花，都一定可以得人钟意噶，好似油腔滑调的“口花花”，就好容易乞人憎！唔想得罪人，咁就一定要跟“熊君”学下呢啲粤语“花”啦。 陈祉伶/文、图 胡鸿钧、郭玮/模特 花咈 fa1 fid1 “花咈”，有时也被讲成“花花咈”，在词典中的释义为形容人举止轻浮，又或者爱打扮、赶时髦。不过在宜家的日常语境中，“花咈”好多时会被当作“花心”去使用，形容人对爱情不专一。而话人花心嗰阵，我哋仲好常会用到“花心萝卜”、“花心大少”呢两个词，后者的谴责意味更强烈，可以指逢场作戏的好色之徒。 造句：睇佢嗰样花花咈噉，为人怕唔係几踏实啵。 花哩花碌 fa1 li1 fa1 lug1 花哩花碌，又可以讲成花哩碌或者花哩胡碌，其实从字面意思不难理解，呢个俚语嘅意思就係形容色彩、图案多样。不过在实际使用中，多数时候表达嘅意思就倾向于形容太花哨，睇到人眼花缭乱，係偏贬义噶。所以用嘅时候都要考虑对话语境，小心激嬲人啊。 造句：呢个造型咁花哩花碌，係你咁靓仔先hold得住！ 花臣 fa1 sen4-2 外省朋友仔可能会觉得广东街坊嘅英文成绩一定特别好，皆因连八十岁嘅阿伯都识讲几句“鸡肠”：巴士（bus）、士多（store）……其实係因为在粤语中，有一大波英文演化来的音译词。“花臣”就係大家好常用到的一个外语谐音词汇，佢係英文fashion的音译词，包含式样、款式、时髦、招数等意思，用在不同语境中都有唔同意思噶。 造句：鸿钧话斋，影杂志封面就梗係要摆个够花臣嘅姿势啦！ 耍花枪 sa2 fa1 cêng1 “耍花枪”呢个词出自粤剧作品《薛丁山征西》，情投意合的薛丁山与樊梨花，因为各为其主，在战场上刀枪相向，虽然画面望落好激烈，实际却只注重花式，并非要打个你死我活。 所以，“耍花枪”就被引申为夫妇或情侣之间的打情骂俏、小打小闹，搞到好似要翻脸噉样，其实只係秀恩爱、撒狗粮。 造句：好心你醒水啲，唔好成日黐住阿爸阿妈，留番啲空间俾佢哋耍下花枪啦。 花生友 fa1 sang1 yeo5 “花生友”就係指爱“剥花生”嘅人，而“剥花生”在粤语中原本係指陪同他人拍拖嘅诙谐讲法，正所谓你有你谈情，我有我食花生，后来“剥花生”也用于泛指等睇戏嘅行为。“花生友”相当于宜家经常讲嘅吃瓜群众，钟意围观下八卦事件，以此作为茶余饭后的谈资，一般冇乜太大恶意嘅。 造句：呢几日热搜榜啲瓜一浪接一浪，花生友个个揸住手机睇到停唔到。
