视后当道 题材创新有睇头

　　新嘅一年，TVB新片单中嘅剧集，题材创意十足。人见人爱嘅小动物，今铺识玩转读心术？传统中医嘅题材，喺新时代点吸引观众？至死不渝嘅爱情故事，中西式各有经典，若果中西式结合，能否扭转局面？呢啲新剧仲有“视后”级人马担大旗、人气新丁加盟，相信会带俾大家唔少惊喜。

　　郭玮/文 官方剧照、海报/图

　　

　　人宠结缘闯情关

　　《宠爱pet pet》用咗大人细路都中意嘅宠物做题材，贯穿全剧嘅汪星人机灵又得意。两位人类主角，一个係相信科学又循规蹈矩嘅兽医，一个係精通动物语言嘅“读心专家”，原本势不两立嘅两人，却在一只可爱狗狗嘅助攻下，实现缘分“一线牵”。而呢只小机灵鬼仲会帮助男主闯情关、破难题添。出演女主角嘅林夏薇，凭《七公主》荣获“最佳女主角”称号后，再次担纲电视剧女主角，搭档人气新仔周嘉洛，玩转宠物情缘。都话动物同小朋友一样好难控制，究竟“视后”薇薇，同因为《痞子殿下》而人气急升嘅嘉洛，可唔可以顺利将呢班“化骨龙”hold住咧？

　　

 

 

 

 

　　传统中医玩新嘢

　　医疗剧一直係TVB非常擅长嘅题材，但中医剧喺TVB竟然已经“断更”咗廿年之久！《你好，我的大夫》用中医做主线，好有话题性嘅“视后”蔡思贝，搭档人气靓仔何广沛，首次合作嘅两人提前熟习中医知识，都表示大开眼界。剧情讲述中医新丁再遇前女友，当初因理念不合导致分手嘅两人，如今係会继续有拗撬，定係成长后逐渐磨合咧？值得一提嘅係，该剧係由曾经打造《降魔的》系列、《爱上我的衰神》等神剧嘅“嘟嘟”方骏钊监制，以佢出品一贯嘅好口碑，同选角嘅观众喜爱度嚟睇，呢部剧一定唔会令大家失望。

　　

 

 

 

 

　　中西双拼奔赴爱

　　东方有梁山伯与祝英台化蝶双飞，西方有罗密欧与朱丽叶为爱殉情，两个经典故事讲嘅都係至死不渝嘅爱情。新剧《罗密欧与祝英台》把几位主人公拉到同一个时空中，当罗、祝两家成为世仇，原本凄美嘅剧本，喺呢一世能否迎来圆满结局？两边嘅主角为爱究竟可以去到几尽？久违电视框嘅陈茵媺，今次搭档真·丈夫陈豪，首次饰演荧幕夫妇，看点够嗮吸引。Aimee虽然未获封“后”，但演技一直被赞，今次佢为角色set咗个铲青发型，中性look都真係大突破，“视帝”老公陈豪更公开大赞太太为复出好努力添。