《婚后事》主创真心话

　　在热播剧《婚后事》中，Yoyo陈自瑶首担大旗做女主角，将“张明芯”曾经的绝望，到努力放低，最后重燃希望的过程，演绎得充满生命力。而围喺 “张明芯”身边嘅两位男士，一个係花咈博爱的“真小人”，另一个係从小宣扬诗书礼仪嘅“伪君子”。不过两位男主角喺现实生活中，都係爱家敬业而且超warm嘅绅士。跟住Color君，一起走进佢哋戏里戏外嘅“婚后事”啦。

　　郭玮/文  秦丽莹、受访者提供、剧照/图

　　

　　陈自瑶：一切都係最好嘅安排

 

　　

　　自信而美好

　　初见Yoyo嘅晚上，天气好冻，落住绵绵密雨，大家都怕佢冻亲。Yoyo话唔惊，撑起雨伞就开始配合拍摄，间隙仲不忘暖暖可乐君·牛牛嘅手仔问：“你冻唔冻啊？”大家都被佢暖心又敬业嘅态度冧到。当时《婚后事》啱播到第二集，“张明芯”正处于疯癫到丧心病狂嘅状态，Yoyo同我哋讲：“你继续睇落去啦，后面佢会完全唔同噶。”果然，随着剧情发展，“张明芯”勇敢追爱、释放自己、放低过去，成就咗更高光、更美好的自己。Yoyo话，自己睇剧本嘅时候，就因为呢个角色向往美好、充满自信,而被深深感动。通过《婚后事》，佢话畀我哋知，爱可以治愈一切，但都需要相爱的两个人足够坚韧，一起去探索同学习。

 

 

 

　　

　　

　　Timing啱啱好

　　千禧年入行成为model，到今日先坐上女主角之位，Yoyo话“时间啱啱好”。由以前演人哋嘅妹妹，到后来成为“刁蛮公主”专业户，后凭借《宝宝大过天》中“叶帆”一角获得“最佳女配角”，依家嘅佢先觉得自己足够成熟，可以饰演“张明芯”咁样嘅角色：“呢个角色好难演噶，需要有一定嘅演技同人生阅历。第一次做女主角，一开始佢压力大到爆煲，瞓都瞓唔着。佢话自己比较内敛，好容易收埋自己，所以会听啲舒缓嘅音乐，或者一个人去啲想去嘅地方，好快就可以relax翻。Yoyo觉得自己好幸运，有好嘅剧本，仲有可以令自己放胆去演嘅团队同对手，一切都係最好嘅安排。

 

 

 

　　

　　

　　进步一点点

　　继《缺宅男女》之后、时隔14年，Yoyo同罗子溢再次合作 ，佢大赞子溢演技大飞跃，但就谦虚话自己其实仲係唔太识演戏，因为有对手的引导，先令佢个角色咁吸引人。旧年，Yoyo开始尝试做主播 ，打开咗新技能的大门，对佢嚟讲係一个全新嘅开始。无论係演戏定係现实生活，佢都遵循不断学习，每次进步一点点嘅原则 ，未来佢都希望继续有好嘅剧本、唔同类型嘅新角色可以发挥，相信好多人都同Color一样非常期待。我哋边采访边玩手工，第一次制作手工戒指 ，Yoyo用心听每个步骤 ，最后仲将自己首次亲手制作嘅戒指，作为见面礼送畀Color嘅粉丝，心意同戒指上嘅布丁模型一样咁sweet。

 

 

 

 

　　

　　

　　罗子溢：提前沟通好重要

 

　　

　　

　　工作负责

　　食古不化、自尊心强、太唔现实，係子溢对自己出演嘅潘善仁嘅评价。大家都闹呢个角色太渣，但子溢反而觉得，呢个人物够真实：“心动係人嘅本能！”“潘善仁”如果可以提前同另一半沟通好，而唔係选择偷偷用写小说做情绪宣泄口，事情嘅结果会大有不同。现实中，子溢都会提前报备自己的行踪。喺演戏方面，佢都希望得到太太嘅肯定，因为对方係“视后”级人马。唔擅长唱歌嘅子溢仲话，佢甚至愿意花超过出场收入嘅学费，去学习唱好歌令舞台做到最好。呢啲係佢对表演完美嘅执着，亦係佢对工作负责嘅表现。

 

 

 

 

 

　　

　　爱意满泻

　　喺我哋同子溢倾计嘅过程中，深深咁feel到佢对屋企人满泻嘅爱意。旧年係佢同太太7周年嘅结婚纪念，子溢话自己喺生活中同太太嘅相处，都係“呃呃氹氹”，好“赖皮”噶。佢在采访中不忘感谢太太为家庭嘅付出、对小朋友嘅照顾，自己平时同仔仔囡囡开心玩耍，已经会畀细路无限嘅energy重击，子溢话：“仲攰过做家务，但好开心噶！”接下来，子溢仲有《家族荣耀之继承者》《执法者们》等剧会同大家见面，期待下唔一样嘅罗子溢啦！

 

 

 

　　

　　

　　黎诺懿：演出唔同视角嘅“自己”

 

　　

　　值得“牺牲”

　　《婚后事》中备受好评嘅“甘诚钧”，係由黎诺懿出演。诺懿觉得今次最难嘅係，要演出每个视角唔同嘅“自己”。喺观众眼中，佢花咈且处处留情；但喺佢自己嘅世界里面，佢又孤独且用情专一，係“全剧唯一好男人”。因为每个人切入角度嘅唔同，要令呢个角色有“角度差异”，同时又要keep住整体人设，就成为对佢嘅考验啦。剧中有唔少大尺度嘅演绎，诺懿话睇到剧本嘅时候确实都有思考过，但佢觉得如果係为剧情发展、感情流露，确实有需要嘅，佢可以奋身去演，令观众更好咁投入。诺懿仲话，好庆幸自己当时状态OK ，镜头出街嘅时候，太太都赞画面好靓，证明自己嘅付出係值得噶。

 

 

 

　　

　　甜蜜“负担”

　　在戏外，诺懿嘅身份都好多，既係演员又係监制，有时仲会做埋主持添，不过要拣出一个最爱，佢就有啲犹豫。做演员嘅时候，诺懿可以放心交自己出去，听导演指挥、被大家照顾；而变身监制时，佢又有机会take care全世界，令成个流程按自己嘅策划发展，每个身份都有佢enjoy嘅体验。呢种“贪心”嘅心理，仲体现喺佢对工作同生活嘅取舍之中。诺懿觉得身为男人工作好重要，因为好好工作先可以令家人嘅生活更好，但两者一定要平衡。有时，佢会带自己嘅小朋友去片场，睇住自己工作，虽然偶尔会觉得仔仔阻住自己，但再仔细一谂，又会觉得这是甜蜜嘅负担。