TVB迈进55周年，适逢台庆进入倒计时，最近佢哋特别推出咗多档情怀向策划，同观众一起回顾曾经嘅辉煌。深夜剧场“向金装剧致敬”栏目，就精选出多部经典电视剧重播。经典从不过时，金装永远迷人，呢啲经典作品见证住香港电视剧嘅发展与进步，亦係大家的集体回忆，值得一再返寻味噶。

　　郭玮/文 剧照、海报/图

　　星光熠熠做精品

　　仅仅得六集嘅《杨家将》，云集咗包括刘德华、梁朝伟、周润发等多位“影帝”级人马，更有刘嘉玲、汪明荃等大咖加盟，係无线影视制作史上，史无前例嘅豪华阵容。剧集讲述咗，北宋时期，杨家忠烈抗击外敌，天庭八仙互相斗气，介入咗凡间呢场保家卫国嘅战争之中。该剧改编自民间传说，集历史、武打、神话于一体，係当时为同亚视嘅《亚洲小姐竞选》抢收视率，而特别赶拍嘅一部台庆剧，由筹备、拍摄直至播出，仅耗时一个月，但大到场地布景，细至头饰配件，都经过重金打造，力求展现每个角色嘅独特之处，台前幕后在每个细节上都精益求精，绝冇马虎，可谓TVB辉煌时期嘅精品之作。

　　实地取景气势足

　　同样群星云集嘅《成吉思汗》，为体现出千军万马驰骋于浩瀚无边大草原上嘅宏大气势，剧组落足本，专门远赴内蒙古草原实景拍摄，呢个举动喺上世纪八十年代，係非常难得噶。呢部电视剧只有十集，却将蒙古大汗忍辱负重、金戈铁壁、一统大漠嘅非凡决心，表现得淋漓尽致。万梓良饰演嘅铁木真，外形粗犷豪放，泰山之崩于前而色不变，而内心柔情似水，对下属体恤、对兄弟真情流露，係表现佢演技巅峰嘅力作。剧中仲有刘青云、郑伊健、郭富城等参演，当时只係客串小角色嘅佢哋，依家个个都已经係叱咤影视圈嘅佼佼者。

　　激烈商战现辉煌

　　见证咗香港风云时代嘅《大都会》，用一场家族百货产业链嘅兴衰起伏，演绎两代人错综复杂嘅恩怨情仇。做惯大侠嘅郑少秋拍档汪明荃，喺呢部剧中化身做反派夫妻，为争名夺利而勾心斗角。梁朝伟戏份唔多，却係戏中难得嘅好人。周星驰初涉电视剧，当时仲未发挥出自己嘅喜剧天赋，而係饰演神憎鬼厌嘅花花公子。呢部几乎全员恶人嘅电视剧，反映咗当时商业社会嘅竞争激烈。直到现在，商战片依然係TVB嘅拿手戏，观众对家族争产、兄弟姊妹争风吃醋、亲戚花式斗气嘅戏份也一直情有独钟，无论过去或现在，呢部电视剧都值得一再回味。