春节就快到，新年新气象，个个都想转个新look！平时着惯通勤装嘅Agnes都想喺新春拜年嘅时候，俾亲戚朋友眼前一亮嘅感觉，梁琤与饶子怀两位“星”级导师，就夹手夹脚帮佢“星”呢，打造一个啱过年气氛嘅轻奢造型。带住呢个look去逗利是，时尚得嚟够晒喜庆，话唔定长辈俾嘅利是都大封啲。

　　郭玮/文 郭玮、陈祉伶/图

　　颜色鲜艳更亮眼

　　细细粒嘅Agnes却偏爱长款外套，平时工作风风火火嘅佢，中意披起过膝嘅长褛，可以全身遮晒、踩点出门，性格比较文静嘅佢多数选择驼色、黑色嘅外搭，衬翻同样深色系嘅长袖，确实係百搭又唔易出错的搭配。不过Agnes身材娇小，过长嘅外套令佢睇落就似小朋友偷穿大人衫，累赘得嚟仲好压身高，披散嘅头发虽然长度适中，但同大衣连为一体，成个视觉效果都冇层次，显得好沉闷。

　　梁老师同饶老师觉得鲜艳颜色更啱节日，根据Agnes嘅个人气质，最终为佢拣咗一条红色针织连衣裙。较为保暖的材质适合秋冬季节，兼顾风度与温度；喜庆嘅红色有嗮贺年氛围感，又可以提亮肤色，令造型更亮眼。连衣裙可以省去搭配嘅繁琐，有弹力嘅面料能贴合多种身型，轻松显出凹凸曲线。换上鲜艳连衣裙嘅Agnes，好似挣脱大褛束缚嘅洋娃娃咁，成个脱胎换骨，变得精致而亮眼。发型老师将佢原本细软偏塌嘅头发发根加热、夹松，再扎起低马尾，将颅顶在视觉上增高，呢个造型令Agnes嘅视线焦点上移，聚焦喺面上。

　　细节增加轻奢感

　　Agnes对眼睛本身就又大又圆，眼睫毛又够长，用睫毛膏扫出根根分明嘅效果，再配上适合长度嘅眼线，即可令眼睛更有神。用香槟金嘅眼影大面积晕染，缩短了眼眉距离，野生眉不需要刻意修得太纤细，可以令整体嘅妆容更大气。针织红裙上已经有闪钻装饰，如果再搭配腰带、胸针反而会显得繁琐，两位老师就拣咗叠戴嘅两个珍珠头箍俾Agnes，配合翻整体嘅轻奢感觉。梁老师专登帮Agnes挑选咗黑色蝴蝶型嘅带钻耳钉，可以中和翻整体配色；中踭嘅短靴可以帮手拉长腿部线条，银色闪粉款够sharp又唔会太夸张，新年气氛瞬间拉满。比起之前累赘拖沓嘅长褛，“星”级后嘅Agnes变成精致千金洋娃娃，乖巧中bling bling发光，啱晒新春嘅氛围。

　　导师指点更“星”呢

　　圆面嘅女仔俾人亲切的感觉，但Agnes习惯性做chok样，加上眼睛大，俾人难以接近嘅距离感。两位导师建议佢影相嘅时候应该笑多啲，甜美度即刻上升。因为针织裙整体比较贴身，容易突出小肚腩，平时都要调整姿态，注意挺胸收腹，就可以完美展示身材。梁琤老师仲细心咁发现，Agnes嘅皮肤偏干，建议佢日常注意补水，适当敷翻补水锁湿嘅mask，上妆嘅时候就可以更贴服啦。

　　星级时尚助力官

　　梁琤、饶子怀