冬天最怕就係手仔冻，整翻对靓靓手套傍身就最适合不过啦。普普通通嘅毛线手套，已经不足以满足各位潮人。想要华丽，可以“镶钻”；唔想阻住玩手机，可以十指开窿；劲怕冻嘅话，加热款就最啱使！呢个冬日里，望住啲手套咁得戚，就算天气唔冻都会心动！　

　　郭玮/文 品牌官网/图

　　华丽 吸睛最紧要

　　传统手套戴到密密实实，保暖功能行第一。依家嘅新款手套，有温度也要风度，保暖冇减分嘅同时，仲会整到鬼火咁靓添。怕靓靓美甲被遮住？将靓甲“涂”喺手套外面咪得咯！如果觉得普通甲油唔够吸睛，换成大粒钻石就掂晒啦。拥有“灭霸”同款手套，包你成为全场焦点，衬埋手套版珠宝链条，贵气马上加100分。如果係追求趣味嘅朋友，仲可以选择喺手套指尖点缀毛球、彩色纽扣等等小饰物，别有一番滋味。好多针织手套亦玩出新意，被织成卡通IP嘅造型，仲可以根据客人嘅要求定制尺码同配色，完全配合你嘅需求。

 　　badstar粉色手套

 　　鼹鼠织物

 　　Lion NANA

 　　TysGrocery x PH5联名戒指手套

　　实用 玩机好拍档

　　手机已经成为现代人放唔抵嘅“牵挂”。戴住手套嘅时候，被禁锢嘅小手指唔方便划手机，虽然唔少手套材质都标榜自己可触屏，但手感始终差啲嘎。呢个时候，可以“开盖”嘅手套就更啱你，随时随地自定义全封闭OR半露指模式，颜色款式任君选择。5指全开放式嘅半露指都係嫌冻嘅话，有啲款式嘅手套就帮我哋喺指尖开咗个窿仔，呢啲窿日常就迷你到可以忽略，等到要玩手机嘅时候，就可以将手指从窿窿度督出来。手套嘅弹性面料能屈能伸，指尖唔会有压迫感，拼手速抢票、秒杀争着数时一定冇问题。仲有设计师将手套同手机壳组装埋一起，毛茸茸材质特别暖笠笠，不过脱掉手套同时就要放低手机，“大头虾”嘅朋友仔就要上心啲啦。

 　　印巴世界

 　　手机壳X手套（青蛙款）

 　　恒源祥兔毛手套

 　　南极人露指手套

　　进阶 升温系数plus+

　　大冬天里，同darling行街街嘅时候，拖下手仔就更warm，但隔住两层手套似乎又少咗温度咧，情侣手套三件款，除咗有单只手款式之外，仲特别配有一个两边开口嘅U型手套，方便两人从中手拉手。唔止情侣啱使，亲子、闺蜜之间一样可以用。另外，有功能三合一嘅手套，将围巾嘅末端设计成口袋，方便大家将手仔袋落去保暖。呢种一体式嘅围巾手套帽，啱晒嗰啲容易漏戴手套嘅朋友。如果一般嘅手套都克制唔住你嘅“寒冰掌”，咁你一定要入手一套可以帮你升温嘅手套啦：呢种手套于手背位置安排咗一个小包包，包包里面配备一个类似暖宝宝嘅发热装置，仲有多档温度可以自己调校，想要几暖都可以自己话事，而且发热装置可拆卸、充电循环使用，够晒环保。

 　　电子发热手套

 　　情侣手套

 　　SIAIG夕阳 小熊家族三件套

 　　三合一手套