佢係神憎鬼厌嘅“嚣屎”，又係人见人爱嘅“巴打”，仲係好chok嘅“T two”……佢係演员罗钧满。最近，佢重拾“儿时的梦想”，回归初心做翻歌手，推出咗首只苦情歌《再见不再见》。资深演员翻挞做新人歌手 ，係重拾亦係挑战。

　　郭玮/文 受访者提供、秦丽莹/图

想重新演“T two”

　　《潜行狙击》里面嘅“黑警”T two，係罗钧满自己都好中意嘅一个角色，同时亦有好多观众，因为呢个形象而认识到佢。但钧满就话 ，呢个角色係佢觉得最遗憾嘅角色：“当时啱入行三四年，谂得太多、演得唔自然，应该可以做得更好的。”如果有机会，钧满话真係好想重新演绎一次呢个角色。入行多年，塑造过好多唔同嘅形象，罗钧满开始慢慢学识点样拿捏剧本的要求；而佢对自己嘅要求，係将一个人物形象演得自然，顺畅表现自己，争取唔NG、唔影响其他演员嘅发挥。过去演的角色都比较正经，罗钧满话好想试下演喜剧，佢觉得自己有呢方面嘅天赋，但亦都明白，要令人发笑其实并不容易。

沟通学习唔好断

　　面对新人辈出嘅新时代 ，罗钧满话自己有危机感。曾经佢不断消费自己过去嘅人气与角色，后来就发现做艺人一定要keep住有新作品出街，观众先会keep住对你嘅关注。钧满希望从新晋嘅年轻艺人身上学到新嘅知识点，呢个做法佢係跟谭咏麟“谭校长”学嘅：“佢（谭咏麟）好中意同后生仔交流，所以好‘长青’（一直都咁红）！”喺佢眼中，无论新人定係前辈，都可以喺自己嘅赛道上发光发热，人生阅历不同，同一个角色演绎出嚟嘅感觉就会有差别，并唔係年纪大就叻晒噶，反而係要同大家多沟通、彼此学习，先会有新的火花。　　

重拾信心做歌手

　　罗钧满细细个就梦想能成为歌手，所以佢打算，近两年会重拾初心，专注翻做歌手。不管演戏抑或係唱歌，钧满都希望带到正能量俾大家，并且欢迎大家俾意见，要接受大家嘅批评，咁先容易有进步嘛。作为一个公众人物，佢身上有一份促进湾区融合发展嘅责任感，希望更多年轻人可以去尝试多啲新嘢，揾多啲机会挑战自己，就好似佢咁，2023年将会投入更多时间去音乐上，佢亦都相信，歌手罗钧满一定唔会令大家失望。