《第一次不是你》嘅纯情“阿宝”、《爱回家》嘅宅男最爱“马子妮”、《反黑路人甲》中chok爆嘅“水姐”、《美丽战场》嘅“最佳女配角”……都係Angel蒋家旻嘅入屋角色。最近，蒋家旻嚟咗广州，专门到可乐生活融媒体直播间打卡，并为“Color厨房”新张“剪彩”，一边接受“烤”验，一边同我哋爆料，准备好就“开餐”啦！

　　郭玮/文  秦丽莹、经纪公司提供/图

　　“反骨”应有“续集”

　　睇惯咗Angel饰演“纯纯兔”“乖乖女”，到咗《美丽战场》，“反骨”成为佢最大嘅突破。为诠释“钟家琪”凶悍时目中无人、六亲不认嘅形象，Angel喺每场戏都使尽浑身解数去发嬲，对佢嚟讲係一个超大嘅挑战。不过如果有机会让佢重新挑角色，佢仲係会选择做翻“反骨琪”。Angel觉得，只要演员能将一个角色生动演绎，一样会发光发热、令观众记住，呢个moment自己就係主角。喺《美丽战场》嘅结局，钟家琪以一身黑衣回归，虽然没有台词，但是意味深长嘅微笑，俾观众留下深刻印象。Angel提到，导演冇解释点解钟家琪会翻嚟，留低充满悬念嘅ending，如果呢部剧有续集嘅话，希望“反骨琪”再衰一啲，maybe联手其他人一起“反骨”，剧情会更加精彩。

　　唔止想演“反骨”

　　Angel话自己细细个就好中意演戏，睇电视嘅时候成日会将自己代入到角色里面，“睇古装片时会想象自己係贵妃，因为女仔都贪靓啊嘛”！Angel啱啱踏入演艺圈嘅时候，充满青春活力、自带青涩感，俾人一种 “邻家女孩”嘅感觉，于是演“妹妹”“囡囡”呢类角色时，就好似本色演出。睇落斯斯文文嘅Angel当时就话，自己中意演反派多啲；依家Angel大个女了，反而觉得扮纯情先更加考验演技。如果以后有机会选角色，佢想挑战更多元化、复杂嘅人物，例如用手语沟通嘅听觉障碍者、视觉受限嘅视障人士等，又或者係律师、医生这一类职场专业人士。

　　自信有新“煮”意

　　今次“Color厨房”咁啱开张，Angel就成为我哋嘅首位“体验官”。整嘢食嘅过程好放松，一边捏住面团，Angel一边分享埋自己嘅小“煮”意啦。平时中意烘焙嘅佢，都会去烘培店试玩，因为有老师教路，亦唔需要自己执手尾。喺屋企时，Angel偶尔会整翻两味，豉油鸡就係佢嘅拿手好菜；而简单又惹味嘅番茄炒蛋，对佢嚟讲有家嘅味道，令人觉得好舒服温暖。可乐君传授俾蒋家旻免发酵嘅整面包方法，一开始佢小心翼翼记住每个步骤，后来喺大家嘅鼓励下，就放开双手发挥，最后制作出“肠仔夹心老虎熊”，得到在场“试食官”嘅点赞。电视上大胆“反骨”嘅“反骨琪”，戏外原来咁贴地，讲到下厨就有无限“煮”意，Angel真係越来越有魅力，期待佢下一个经典角色！