在香港小姐2023决赛舞台上，尽管佢冇开声唱歌，但却有好多人注意到呢位“弹钢琴的靓仔”，以标青外貌出圈。佢就係我哋嘅老朋友Oscar涂毓麟。自从参加综艺，佢多咗一啲演戏嘅机会，体验好新鲜，但讲到最能表达自己嘅方式，佢最爱的仲係音乐。

　　郭玮/文

　　经纪公司提供、秦丽莹/图

　　拍戏轶事亦出圈

　　旧年年底，Oscar参加咗公益类经营向综艺《加油！小店》，帮助濒临消逝嘅传统小店渡过难关。参加综艺之后，佢多咗好多露面嘅机会。喺依家热播嘅中医电视剧《你好，我的大夫》第一集中，Oscar客串咗一位失声歌手。佢回忆道，当时导演话俾佢知要被针拮，佢大安旨意地以为只需要拮下喉咙，点知仲要露出肚腩仔，佢毫无准备噉献出咗自己嘅“处男露肌”，Oscar回头有啲“追悔莫及”：“真係完全冇准备 ，所以先会係肚腩……”为咗顾及各个镜头，Oscar喺呢场短短几十秒嘅针灸戏中，被拮咗超过50针，不过佢自称自细就唔怕打针，话：“其实都OK嘅，唔会痛！”虽然话落针有专业师傅帮手，但始终係嗰50针，睇到呢一幕嘅观众都觉得有啲心疼佢！接下来，Oscar会参演另一部电视剧《香港重案》，喺入面饰演重案组阿sir，戏份会多好多，大家可以期待一下啦。

 　　《你好，我的大夫》剧照

　　音乐唱嘅係自己

　　Oscar觉得，演戏可以体验好多唔一样的“人生”，但佢始终觉得音乐先最能表达自己。今年，佢喺音乐方面都有好多发展机会，同“小草”朱主爱去校园busking、上大型晚会表演、仲做埋Mike曾比特巡演嘅特邀嘉宾。Mike嘅每场show几乎都会邀请Oscar，两个人其实 friend咗咁耐，直到今次巡演先有正式合作嘅机会。Oscar同Mike最近仲合作咗新歌《接触不良》，轻快的节奏令人好愉悦。作为嘉宾登台，Oscar每次可能会唱三首歌，佢会因应唔同嘅地方修改自己嘅歌单，例如在佛山站有致敬港乐的《为你钟情》；在上海站就特意唱翻自己当时为综艺创作嘅歌《加油！小店》。佢仲话，自己对于音乐嘅创作比较随意，平时玩开钢琴嘅时候，玩出好听嘅旋律就会记落嚟。

　　心思细腻“整饼人”

　　Oscar嚟我哋可乐生活融媒体直播间玩嘅时候，咁啱临近中秋节，佢决定同可乐君一起整翻份sweet月饼应下节。一开始我哋都以为，冰皮月饼就係将原材料捞匀、再塞入饼模里面，印个图案再倒出来，就完成了，但到实际操作时才发现，最难是用料比例，要控制调配面团嘅水份，又要照顾到饼皮表面嘅干粉量，想整出皮薄、馅多、外形靓仔嘅冰皮月饼，真係一啲都唔简单。贪玩嘅可乐君仲增加制作难度 ，要Oscar徒手制作一款原创造型嘅冰皮月饼，Oscar超识冧人，即刻整个可乐君·牛牛，细致到连头发丝都一条条搓出嚟！最后嘅成品，大家都捧喺手上、冇人舍得食。对于食物，Oscar直言会同音乐一样，都係好传统的，喜欢传统的味道、比较旧的歌。相信如此心思细腻嘅佢，在音乐上亦能带给我们惊喜。