由细到大我哋都会面对好多选择，其中“食乜嘢”就係最日常又充满回忆的问题：细细个零用钱唔多，要pick到自己最冧嘅一款零食先出手；大个咗诸多顾虑，每日的quota要留俾最期待的美味……既然小孩子才做选择，依家不如适时长大，跟住歌手邓思朗放肆开食啦。

　　郭玮/文   蔡志choichi、何崇仪/图

　　流泪品“小学味”

　　仲读紧书嘅时候，我哋最期待嘅就係放学，可以约埋啲朋友仔，笃个鱼蛋、买个小点心，垫下饥肠辘辘嘅after school time。可乐君同思朗特意去到小学门口觅食，试下搵翻旧阵时的味道。足料浓郁的碗仔翅，多醋重胡椒，再按自己喜爱加埋麻油，入口顺滑暖胃，一碗翅两个羹互相喂食，更能品出读书时情窦初开嘅sweet。老式点心铺嘅葱油包依旧诱人，叉烧酥曾经係我哋眼中嘅奢侈品，思朗就话肠仔包最令佢心动，因为係佢以前开始营业的最大动力。淀粉肠的口感比以前更佳，加上微甜沙拉酱，确实係小时候的味道，啱啱出炉的面包好松软，搭配冰汽水刺激满足，饮热豆浆就显得比较养生。机缘巧合食到市面上好少有的香蕉糕，胶胶啲嘅香精味竟意外令我哋有感慨，思朗笑称呢种味道就係佢童年嘅梦想：“以前好想试下，啲水果形嘅胶擦係咩味，原来就係咁！”

 　　烤鹌鹑蛋

　　长大应随心行

　　可乐君同思朗嘅放肆扫街计划，源于佢最近推出嘅全新单曲《小孩子才做选择》。由细到大，我哋都会面对好多选择，从简单嘅选边款零食开始，到感情、事业嘅选择，都容易令人迷惘苦恼。年少时天真烂漫，做选择可以无后顾之忧，而且万事有大人帮手兜底，自然可以慢慢拣，miss咗最多再拣一次。长大经历多咗，责任重咗，选择时要瞻前顾后，与其犹犹豫豫，不如试下勇往直前……思朗嘅《小孩子才做选择》就係话俾我哋知，其实“唔选择”都係一种选择，放下执念随心而行，可能会有唔一样嘅惊喜！如果有时间，不妨边听住思朗嘅新歌，漫步街头放肆开食，搵翻最真实嘅自己啦。

 　　青红椒炒鱼仔

 　　胜瓜汤

　　飙汗试“大人嘢”

　　“怕肥”係现代年轻人抑制自己胃口嘅借口，既然话要放肆长大，用大排档热炒做宵夜就係可乐君同思朗嘅任性啦。避风塘炒蟹，有干脆嘅炸面包糠覆盖在鲜美肉多的炒蟹上，啖啖香口但不至于油腻；如果嫌蟹壳难剥，可以试下避风塘炒粟米，爆汁清甜嘅粟米粒啖啖满足，咸甜交错、冲击味蕾，令人觉得新奇又上头。爆膏奶油虾鲜红油亮，十分诱人，虾肉咬落爽脆弹牙，渗出阵阵奶油香，至于虾头有冇爆膏就要睇运气啦，过咗油镬嘅虾壳其实非常脆口，慢慢嚼碎，满口鲜香，送冰啤、冷饮非常和味。酥炸鱼仔就比较油腻，配上青红辣椒就啱好中和，微辣轻刺味蕾，食食下又上瘾又停唔到口，唔少朋友会辣出一头汗，宵夜时光因此畅快淋漓！油炸、爆炒之后，通常会用胜瓜花甲汤做个ending，清爽解腻又暖心，放肆开食、健康收尾，机智嘅成年人都会好好锡住自己嘅肠胃。