下午饮杯咖啡，打工人又能充满能量！而选择一家咖啡店，除了咖啡的品质，仲有佢哋嘅颜值。开工之后，可乐君帮大家揾到几间非常“出色”嘅咖啡店，一定会令你眼前一亮，充电成功！

　　黄译萱、饶禧/文、图、模特

　　禁止焦“绿”

　　打工人每日望住公司部电脑，难免眼睛攰、脖头痛，呢个时候就需要一间“绿油油”嘅咖啡店，放低焦虑、享受半刻宁静。喺体育西横街里开咗20年嘅老字号“郁源咖啡”，係自烘门店嘅“手冲天花板”，亦係唔少打工人休息嘅“老地方”。门店好低调咁藏喺卡蒂姆咖啡树荫底下，一入门店铺细而温馨，各种小饰品琳琅满目，古早味十足。每个角落都有绿植搭配，大家睇到都能舒缓眼部疲劳。抬头就係各地各式嘅咖啡豆，空气中阵阵飘香。餐牌细致，仲会标埋咖啡豆产地、用料同味道，可以一清二楚咁选择自己嘅喜爱。此时此刻，放低上班的快节奏，慢慢叹一杯醇香味浓嘅咖啡啦。

　　“红”你开心”

　　上班唔使咁愁，一抹红色帮你醒神！位于荔湾老城区嘅Lifecycle Coffee，匿埋喺西华路小巷里面。店门口有一个显眼又吸睛嘅红色笑脸，上面大大只字写住“啡常开心”，墙面各种可爱又得意嘅贴纸，复古又充满童趣，就连创意特调都有好玩名称，譬如“芭厘岛”“”杏花山”“梨梨万乡”……可以试下特色combo（一豆两饮），选择酒香甜巧呢款豆，奶咖嘅黑巧克力风味更显浓郁、奶泡都好绵密；而黑咖就会更加突出酒香味。好玩嘅係，一入店，作为“优秀员工”嘅一猫一狗即刻过来营业，活泼热情又黐人，劲识得氹客人开心，令你忍唔住放低手上工作同佢哋玩。

　　“紫”想放松

　　一条种满紫荆花树嘅小巷，树下係一间紫色嘅澳式社区咖啡店“MateMade”，好啱约埋三五好友来放松。巨大嘅店铺招牌点缀上紫色，让咖啡店成为社区街道最惹眼嘅存在。户外嘅区域係大家最钟意嘅，黄色嘅原木店面，窗户上挂着百叶窗，街道边摆住紫色板凳，松弛感呼之欲出。主理人曾经生活喺澳洲，佢想把随性嘅生活方式分享畀更多人。佢在店铺玄关处，摆咗黑胶机、黑胶唱片同书籍，让每位访客都能来一次“灵魂交换”，用兴趣拉近彼此嘅距离。室内空间都用原木装修，全开放式嘅柜台，让店内发生嘅故事一目了然，包括纯手工制作嘅咖啡和西点。你可以饮到最好饮嘅Flat White，食到最惹味嘅牛角包，享受最chill嘅街头咖啡氛围。

　　“橙”浸摸鱼

　　打工人聚集嘅科韵路，咖啡店係好多人嘅刚需。呢间美式复古风嘅“涨水咖啡”，就藏喺写字楼中，“水”能生“财”，咖啡店名够晒好意头，仲可以让打工人落楼就饮到特别嘅咖啡，以各种姿势享受摸鱼时光。店里有好多款特调，名字都好得意：花果香嘅“娜娜小姐”，入口泰奶混合坚果味，醇厚又丝滑；“黑皮诺”加入咗气泡水和黑加仑果汁，清爽又醒神；曲奇嘅造型搞怪又精致，食一啖心情都变好嗮！店内放住好多唱片和绿植，环境慵懒又松弛，橙色嘅皮沙发摆放在角落，好啱收埋自己，齐齐摸鱼或者匿埋摸鱼都可以！