眨眼间，夏日就杀到啦！学生哥仔放假，梗係要开启“逛吃逛吃”模式啦。可乐君最近发现，商家们为咗捉住“为食猫”嘅胃，真係绞尽脑汁，各出奇招！快啲跟住我睇下呢啲新奇到爆嘅美食，你最想试边一种呢？

　　饶禧/文

　　饶禧、黄译萱/图

　　黄译萱/模特

　　华夫饼可晾晒

　　想食潮流新鲜嘢，点少得“潮到风湿”嘅东山口！最近火到爆嘅“FIVEMATE”奶茶店好易认，无论店嘅装修定係出品，全部都係绿色系嘅，让人一秒穿越东南亚。店内最受欢迎嘅“斑斓竹篮华夫饼”，竹篮造型加上清新嘅斑斓绿，靓到唔舍得食！食客们仲脑洞大开，用竹竿当衣架，将华夫饼挂起身影相，氛围感拉满！睇落清新嘅华夫饼，食落有斑斓清香和华夫饼嘅酥脆，最后融入表面撒上的糖霜，风味独特，口感丰富！饮品都超有心思，搭配同色系嘅“恐龙熔岩杯”马黛茶，上层香蕉味棉花糖加入milo粉，可可味的茶香唔会太苦，双重口味“夹击”，饮起身顺滑到好似“德芙巧克力”，正到冇朋友！

　　“窿窿鞋”香喷喷

　　广东人有多爱“窿窿鞋”（即洞洞鞋）？落雨、出街、上班，一对洞洞鞋全程通用！但你绝对估唔到，我哋老广竟然连“洞洞鞋”都食落肚！喺广州潮流圣地之一嘅江南西，有间“富贵食饭公司”，将洞洞鞋同鸡蛋仔玩Crossover！大家用12蚊就可以食到24码嘅“拖鞋鸡蛋仔”，造型逼真，仲帮你配埋可爱“鞋花”，一睇就想“咔嚓”影相发朋友圈。店家用香浓蛋浆现烤，只要等四分钟，热辣辣、香喷喷嘅“窿窿鞋”就新鲜出炉！趁热咬一啖，成个鼻腔都係蛋香味。拣芝士味嘅话，每一啖都有会有拉丝效果。唔单止咁，店家仲会推出“火箭龟龟包”，绿色嘅龟仔面包夹住两条肠仔，表情呆萌到爆，得意到令人唔舍得食。呢个包三层超有料，上层係脆皮菠萝包，中间有鸡扒同肠仔，底层面包松软，“碳水炸弹”入口饱肚兼满足。食完“窿窿鞋”又食“龟包”，啱晒颜值控心水。

　　龟苓膏坚有龟

　　喺广东美食界，一直流传住“老婆饼冇老婆，煲仔饭冇细路仔”嘅搞怪说法，但龟苓膏里面，真係有龟！去到天河甜品老店“韵姐甜品”，一定要食一碗清热解毒嘅龟苓膏。呢度嘅龟苓膏，除咗用真材实料龟壳熬制，上面仲放咗只Q弹到爆嘅“乌龟”！轻轻拮一下，龟仔就“Duang Duang”震，可爱到犯规！龟苓膏本身係下火良药，配上秘制顺滑炼奶，初初食落去有啲苦，伴有淡淡草药香，但食多两啖，口感爽滑细腻再加上回甘滋味，最啱夏日清凉解暑。