当生日帽戴上毛茸茸嘅脑袋，当蛋糕烛光映亮湿漉漉嘅鼻尖——我哋唔单止喺度庆祝佢又大一岁，更为纪念彼此妙不可言嘅羁绊。现在，“屋企人”呢个概念不再仅限人类，萌宠生日派对已经从小众仪式，发展成现代家庭嘅情感刚需。萌宠们会有宠物专属嘅蛋糕、新衫同礼物，表达对毛孩子最真挚嘅心意，氹佢开心亦係氹自己开心！今期，跟住可乐君一齐潜入爱宠生日趴现场啦！

　　黄译萱/文   黄译萱、品牌官网/图   林佩芝/模特

　　订蛋糕比心意

　　左边猫猫蛋糕、右边“便便cake”，点解有咁奇怪嘅生日趴？原来今次“寿星”係一只钟意便便嘅小猫，主人特别帮佢打造两款蛋糕。专属造型嘅宠物蛋糕，可谓萌宠生日会嘅标配！好似呢款1:1还原嘅立体猫猫蛋糕，唔单止复刻寿星猫最得意嘅时刻，连口味都係为猫咪量身定做嘅：肉泥做胚、奶酪裱花、果蔬调色，所有食材都严格符合《宠物饲料卫生规定》，切开时肉香四溢，既啱宠物仔胃口，又食得安心。烘焙品牌“好利来”早前推出嘅宠物烘焙系列，令宠物主人们有咗更多选择，萌爪、毛线球、骨头等造型蛋糕颜值爆表，就算价格係普通蛋糕嘅两倍，铲屎官们依然甘愿买单。而宠物烘焙工作室“专属定制款”更贴心：会根据毛孩日常神态设计嘅立体造型，口味係主人们对食材搭配嘅考量。呢个充满爱意嘅生日蛋糕，除咗有味觉惊喜，更係主人用心思砌出嚟嘅成长祝福。

　　　　骨头系列蛋糕（图源：Holiland好利来）　　宠物蛋糕（图源：Holiland好利来）

　　扮靓靓有氛围

　　着上蜜蜂造型连身衣，绒毛帽仔上嘅触须仲会揈揈下（揈读fing6，意为‌甩动、摆动），被铲屎官揽实喺蛋糕前影“全家福”——呢个画面，绝对係宠物生日趴上必须有嘅温馨名场面！宠物BB扮靓早已唔止为出片，更多俾佢哋“家人”一样嘅仪式感：边个细路生日唔着新衫？生日靓衫已经从一次性道具，升呢为设计感单品，千篇一律嘅生日帽和小皇冠，被有质感嘅钩针和绒布帽仔代替。田园风party必选“茄子帽”，萌宠戴起即可变身农场小萌物。戴帽唔够稳？可爱又舒适嘅手作围兜兼顾新意同心意，就算寿星仔周围跑，都唔惊整乱成个look。参加party嘅朋友都要讲究dresscore，主人着上印住宠物唛头嘅“应援Tee”，亲友团戴上同款主题徽章，镜头一扫，成个派对嘅氛围感直接拉爆！设计宠物衫嘅过程，更係一场“回忆杀”，会勾起你同佢生活嘅点点滴滴。

　　　　茄子造型帽子　　定制宠物衣服（图源：视觉同萌宠物定制）　　宠物围兜　　宠物围兜佩戴效果

　　花心思送大礼

　　来到生日趴，寿星猫可能会扑上来，对你蹭蹭抓抓，主人家会送你诚意满满嘅伴手礼，入面会有印住佢个猫样嘅锁匙扣、立牌等寿星周边。话係来庆生，其实都係想撸猫撸狗，想要得到“寿星公”宠幸，而且礼尚往来，你份“生日礼”梗係要花啲心思，可乐君俾啲思路你。“专属款”就要有宠物头像，例如印有宠物仔头像嘅食盆，一睇就知是谁的吃饭架罉；“网红款”考虑丑抱枕，佢有种不管宠物仔“死活”嘅美，丑萌设计充满魔性；“手作系”就用扭扭棒DIY彩虹逗猫棒，够缤纷又易上手，出镜率高，“寿星仔”可能追你跑足成晚；想送“收藏款”，可以订做毛毡公仔、手绘肖像画等，收录“寿星仔”嘅靓仔时刻。其实礼物价值高低并唔重要，最冧係背后嘅心意：你拧扭扭棒拧到手指痛，佢追到毛都炸；你捧住丑抱枕笑到飙泪，“当事喵/汪”懵懵哋蹭你心口……呢种互动和回忆，先係生日趴最珍贵嘅礼物。

　　丑猫抱枕　　宠物画像　　宠物生日趴伴手礼　　定制宠物食盆　　扭扭棒逗猫棒