“好命哥”陈伟霆最近拍摄《爱情慢慢》，频繁到广州、佛山取景，跟住佢拍摄嘅脚步，就可以解锁广佛两地藏在烟火里的踏青好去处！春日暖阳下，沿住广州沿江路行走，昔日辉煌嘅“顶流”建筑群依然好靓仔；逛佛山嘅社区公园，秒get活化旧物嘅新鲜创意。呢趟由明星“带路”嘅city walk，既感受到春日生机，又睇到复古韵味，好有意思。

　　郭玮、黄译萱/文、图

【广州篇】

　　“南中国之冠”

　　陈伟霆喺新剧入面“跟踪女友”嘅镜头，就喺广州爱群大厦楼下取景。爱群大厦，又名爱群大酒店，係广州首座钢框架嘅摩天大楼，哥特式复兴风格融合岭南元素，当年享有“南中国之冠”嘅美誉。依家大厦内依然营业嘅爱群大酒店，主营住宿和餐饮，大厦内特设“爱群印记馆”存放咗唔少老物件，游客可以从展品、老照片、纪录片中，感受岁月沉淀。馆内嘅复古旋转楼梯，可谓拍摄复古大片嘅绝佳机位之一。走出印记馆，经过爱群大厦嘅骑楼，可以见到好多爱群大厦嘅历史照片，同灰色水泥外墙特别相衬，好啱换上复古造型来打卡。呢座广州昔日嘅“顶流”建筑，真係从过去靓到依家。

　　大钟楼top one

　　沿住江边行，就到永安堂，即如今的越秀区少年儿童图书馆。佢当年係仅次于爱群大厦嘅广州第二高楼，因楼顶设有大钟，成为广州当时最高嘅大钟楼。今次《爱情慢慢》女主角嘅 “办公室”，就取景于永安堂 6 楼嘅cafe里面。永安堂曾经係虎标万金油生产和经销场所，近十年先改建为图书馆对外开放。馆内阅读区充满童趣，动物造型书架、彩绘墙壁、蘑菇屋读书区都十分可爱。今次被剧组借用嘅cafe，本身就小有名气，佢最大亮点係拥有一线江景大露台，点杯咖啡叹下午茶时光，十分惬意。店内仲有复古小包间，旧茶几配皮椅，台灯嘅黄光增添暖暖嘅氛围感。值得一提嘅係，cafe最大程度保持原来嘅装修，连窗口都保留最传统的手动铁框推窗。

　　初代摩天大楼

　　南方大厦都係沿江路上经典嘅地标，佢原名“城外大新公司”，係广州第一座钢筋混凝土建造嘅高层建筑、中国首座十二层 “摩天大楼”。当年南方大厦百货商店包揽市民各类百货需求，成为外地游客必逛嘅“打卡点”，更有“未去过南方大厦，都未算嚟过广州”嘅说法。依家嘅南方大厦由百货转型做数码批发城，虽然场内难寻当年印记，外立面却一直保存得唔错，喺江边漫游、江中游船嘅时候，佢依然係沿江建筑群中标青嘅一员。

【佛山篇】

　　南海旧大门

　　陈伟霆同钟楚曦拖手嘅戏份，似乎自带老派约会嘅滤镜，原来喺佛山桂园社区取景嘅。佛山老一辈嘅街坊话：”见到桂园，就来到桂城了“。作为桂城昔日“大门”，桂园社区已经有百年历史，晚清李氏富商曾在此兴建私家园林“桂园”，后来南海县政府迁到此处，桂园就成为南海县嘅象征。依家嘅桂园仲保留住当年风貌，气派嘅旧政府大楼自带喷泉水池，桂园公交站保留咗大型候车室，桂园牌坊下嘅百富露奶站曾经是社区收发室，充满怀旧气息。外贸街上嘅服装店已经开咗三十几年，款式唔算新潮，但胜在够平靓正；十蚊鸡食到饱嘅傅记牛杂，下午四点开档，街坊个个都等住食；桂园车站旁嘅“应记”云吞面，那一口鲜香，可以话喺佛山街坊嘅集体记忆，食完仲可以带份沙琪玛做早餐。呢度有故事，亦有日常嘅烟火气。

　　城市潮C位

　　陈伟霆拍戏嘅剧组，拣咗去千灯湖一带拍夜晚嘅镜头。呢度係南海新晋“顶流”，后生仔女扎堆，夜经济旺到爆，有唔少影视剧、综艺节目都嚟过取景。令桂城尽显公园城市魅力嘅千灯湖公园，湖面倒映魁星阁，湖岸陡坡种满花草，夜晚万家灯火亮起，湖面光影浮动，影相开“夜景模式”分分钟影到人生照片。湖边新开嘅威士忌文化街，被街坊叫做“小琶醍”，欧式复古风嘅亲水露台、湖景舞台，水影灯光环绕，到咗夜晚真係好适合开派对。湖边嘅青苔茶室走新中式风格，围绕大榕树而建，令人如同置身大自然。对面嘅千灯湖创投小镇玩转建筑美学，金色长廊日头係金光大道，夜晚着灯犹如星河；红砖墙建筑线条独特，工业风雕塑随处可见。旁边嘅“咖啡一条街”，开着风格各异嘅咖啡店，黑胶复古feel、搞怪童趣风、清新露营风……难怪年轻人都喜欢来打趸。

　　年代剧“影棚”

　　陈村花卉世界已经声名在外，冇谂到旁边嘅潭洲村都藏着一个复古“影棚”。潭洲村曾经係公社队址嘅聚集地，建筑遗址被活化后，继续保留上个世纪80、90年代嘅风貌，成条街似老电影布景。墙上或者写着旧标语，或者贴满卡通海报，青砖屋还原了当年供销社、区家饭堂等场景嘅模样，红绿配色嘅新华书店，贴着巨大“录音带”嘅音像店，贴着当时嘅最hit明星海报嘅理发店，红色“省凳”、“俄罗斯方块”游戏机、写住“陈村”嘅老式日历等“旧物件”，都被放大成背景……嗰个年代嘅回忆一下子返晒嚟！一步一景，逛完呢个街区，你嘅年代剧就杀青啦。