近期播出嘅电视剧《逐玉》爆火，将取景地浙江绍兴嘅新昌大佛寺带入大众嘅视野。其实，绍兴独有嘅江南水乡景色，一直係文人墨客钟爱嘅。正是江南四月天，我哋就循着剧情脚步，下江南赏水乡，入戏入画。

　　黄译萱/文、图

　　跟“迅哥”返学

　　作为鲁迅嘅故里，呢度似係一个沉浸式体验嘅“鲁迅文学乐园”，带你走进童年时课本嘅场景。我哋嘅体验就从“百草园”开始，喺碧绿菜园中兜个圈，瞬间就明白“迅哥”童年嘅乐趣。跟住鲁迅足迹，穿越石桥流水，果然揾到“先生”嘅三味书屋。书屋嘅牌匾、字画、书桌，简直同课文描述嘅一模一样！鲁迅为提醒自己唔好再迟到而刻咗“早”字嘅书桌，仲保留喺度。想更了解“迅哥”，就要去旁边嘅鲁迅纪念馆，佢嘅一生好似电影画卷咁徐徐展开，墙上仲隐藏各种“鲁迅名言”。街头巷尾，Q版鲁迅好似NPC随机刷新，揸住本《新青年》睇、食紧“闰土”看守嘅西瓜......各种得意姿势，让人忍唔住想同佢合照。最后，去文创店买返件鲁迅主题冰箱贴，今次跟“迅哥”返学嘅任务先叫做完成。

　　“中间挂着一块匾道：三味书屋；匾下面是一幅画，画着一只很肥大的梅花鹿伏在古树下”　　“出门向东，不上半里，走过一道石桥，便是我先生的家了”　　“我家的后面有一个很大的园，相传叫作百草园”　　

　　入戏叹水乡

　　坐喺枕水小巷，听住木椅吱呀声、浣衣捶打声、乌篷船摇橹声......这优美嘅江南水乡，是“书圣”王羲之嘅故乡，亦係电视剧《吴邪私家笔记》中“吴山居”嘅取景地。相传王羲之为卖扇阿婆题字嘅题扇桥，依家停满了乌篷船；从书法墙旁嘅蕺坊桥抬头远眺，你会见到蕺山同民居嘅白墙黛瓦融成一幅幅水墨画。呢度每间小店都有啲“古怪”：八十岁爷爷经营嘅“老爷爷书店”，藏住上世纪出版嘅连环画和字帖；有涧咖啡嘅临水阳台，可以望住乌篷船喺脚下穿行；不过氛围最local嘅当属外围嘅萧山街，街市上全部係当地人食开嘅糕点小吃。想坐乌篷船嘅朋友咪心急，穿过居民区去到八字桥，呢度嘅水道生活气息更浓，岸边垂柳拂水，影相都特别出片。

　　绍味“三件套”

　　《梦华录》入面热火朝天嘅市井热闹，从茶馆延续到街道，一如取景地仓桥直街嘅浓郁烟火气。街上聚集咗超多绍兴知名食肆，无论帮衬边间，都一定要试下呢三道招牌风味：黄酒、臭豆腐、绍三鲜。绍兴有“黄酒之乡”之称，黄酒一啖落去温润醇厚，回甘悠长；未够喉嘅话，就点份醉蟹开开胃，酒香渗入晶莹剔透嘅蟹膏，口感似啫喱般滑溜；饭后来一支冰凉绵密嘅黄酒棒冰，奶香同酒香嘅融合，口感绝妙。主菜当然要试“绍三鲜”，菜名叫“三鲜”，但其实用料远唔止三样，你可以一次过品尝鱼圆嘅滑溜、肉圆嘅扎实、绵软多汁嘅肉皮，香喷喷嘅蛋饺、鲜甜嘅河虾、爽脆嘅时蔬，呢道菜十足佛跳墙咁，一锅集齐山珍、海味、时蔬精华。小食就要吃臭豆腐，绍兴嘅臭豆腐口味温和，外皮炸到金黄酥脆，入面白嫩烫口，蘸上甜辣酱，咸、甜、臭、香几种味道交织，会令人越食越上瘾。