|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
广东人究竟有几爱生果？饭前食係开胃菜，饭后食可以做甜品，更发明出清蒸、蘸料、煲汤等多种食法。对生果爱得深沉嘅广东人，仲将生果融入到粤语文化中，一于就等Color带你去认识下，嗰啲只有广东人先识嘅“粤式生果”啦！ 陈祉伶/文 秦丽莹/图 郭玮、黄芷晴/模特 得个桔 deg1 go3 ged1 “得个桔”其实係“得个吉”嘅谐音，多数指付出很多却竹篮打水一场空。因为粤语中，“空”与“凶”同音。而好讲意头嘅广东人，又习惯将唔好听嘅字眼换成顺耳吉利嘅词，好多时便会用“吉”去替换“空”。好似冇人住嘅房子叫“吉屋”，待租售嘅商铺叫“吉铺”。所以两手空空、没有收获的结局，便被叫作“得个吉”。后来，这个词演变成“得个桔”。 造句：寻晚等流星雨等咗成晚，半粒流星都见唔到，最后得个桔。 食柠檬 xig6 ning4 mung1 柠乐、柠茶、咸柠七……柠檬作为清爽饮品中不可缺少的宠儿，係好多朋友仔嘅夏日至爱。虽然柠檬饮品大受欢迎，但“食柠檬”就唔係咁快乐啦。喺粤语中，“食柠檬”，通常就係形容一个人对去其他人表达好感嘅时候，例如示爱、拍马屁……被人不留情面地拒绝，就好似将一大块又酸又涩嘅柠檬食落口，真係好鬼难受！ 造句：人哋一早话咗唔中意红玫瑰，你仲送俾佢，唔怪得你食柠檬啦。 食冻柑 xig6 dung3 gem1 北方冻梨好滋味，但广东“冻柑”咪乱食！因为粤语中嘅“食冻柑”，通常係指喺气温低嘅，被人突然用冰冷的双手或其他物体贴在皮肤上，真係冻到人精神一振，感觉好似吃咗个冰冻嘅柑橘咁！不过“请人食冻柑”要注意社交距离，一般只係好朋友、情侣之间玩嘅小小恶作剧；开玩笑要适度，应激反应下，就算係老友记“友谊的小船”都会“说翻就翻”。 造句：天气咁冻，等我洗湿对手，阵间静静鸡请阿May食个冻柑先！ 青砖沙梨,咬唔入 qing1 jun1 sa1 léi4-2,ngao5 m4 yeb6 沙梨係梨子中嘅一个品种，皮色褐，肉较粗，相比其他梨会难咬啲。而青砖也係一种结实坚固嘅材料，据闻仲会吸水。于是衍生出“青砖沙梨，咬唔入，仲蚀啖口水”嘅说法，用来比喻十分精明又孤寒嘅人，别人不能轻易从佢身上占到便宜。有啲地方又会将“青砖沙梨”叫作“铁沙梨”，同我哋常用嘅“铁公鸡”差唔多意思。 造句：想阿强请食嘢就咪使旨意啦，佢正一青砖沙梨，咬唔入噶。 卖剩蔗 mai6 xing6 zé3 一般识货嘅人买蔗，都会拣蔗头或者枝节较少嘅部分。又甜又靓嘅蔗被人拣走嗮，剩低没人买嘅“卖剩蔗”便只能打折处理。粤语中意思相近嘅词，仲有“箩底橙”。旧时，呢两个词多用嚟嘲讽大龄未婚女青年嘅。不过随住时代发展，呢种物化女性嘅讲法已经好少提。如今，“卖剩蔗”更多用于指代品质差、被拣剩的商品。 造句：呢只牌子自从被人踢爆用假料之后，佢啲产品就变嗮做卖剩蔗咯。 黄皮树鹩哥, 唔熟唔食 wong4 péi4-2 xu6 liu1 go1,m4 sug6 m4 xig6 “鹩哥”也叫“八哥”，係一种善学人语嘅鸟类，据说佢仲好精叻，识专拣熟透嘅黄皮来啄食，唔熟嘅通通唔吃。所以，粤语中会用“黄皮树鹩哥——唔熟唔食”，去形容某人专门占熟人便宜，甚至专门坑骗熟人。 造句：呢间铺正一黄皮树鹩哥——唔熟唔食噶，越係熟客，收费越贵，大家咪再去帮衬啦。
