“石敢当”现身 靓声冧“小熊”

 

　　

　　前段时间，Color嗰“死党”胡鸿钧终于喺羊城创意产业园中央车站，举行咗自己出道10年的首场内地音乐会。除咗用靓声陪“小熊”happy之外，担心大家睇完show怕夜归，Hubert仲暖心提示：大家今晚唔使惊，因为“石敢当”喺度！

　　

　　郭玮/文  经纪公司提供/图

　　

 

 

　　

　　诚意送上最强福利

　　

　　

　　“The DAY到此·开始”音乐会由《心跳移植》拉开序幕，就如同歌词所唱“旧人、新欢都已被接走”，只剩低歌迷与偶像此时此刻嘅音乐对话：酸味十足的《朋友身份》、放肆自在嘅《今天不营业》、励志不忘初心有《伟业街》……Hubert将出道十年嘅精选经典一一呈上。而之前胡鸿钧应承大家嘅新歌《我们在结束时开始》，就成咗当晚现场歌迷尊享嘅“最强福利”。首次嚟到内地开show，胡鸿钧落足心机准备，只为向大家呈现最完美嘅舞台；台下“小熊”亦暖心反馈，准备一片橙海应援，星星闪灯照亮夜场，伴着Hubert靓声共度难忘一夜。

 

 

 

　　

　　

　　惊喜互动冧爆fans

　　

　　

　　早前同Color倾计嘅时候，Hubert就透露今次嘅翻唱歌单，会同以前嘅有好大唔同。换上一身绅士西装嘅佢先係化身钢琴王子，自弹自唱的《安静》，情深款款冧到台下观众神魂颠倒。投入翻唱的《心淡》令人动情，《祝君好》更係令大家梦回“十月初五”，“初哥哥”上身嘅胡鸿钧温柔到极致，丝滑音符轻抚双耳，赏心悦耳。为咗与“小熊”更亲密互动，喺“心意卡”环节上，Hubert仲抽咗lucky fans起身同自己合唱代表作，有位“假粉”唔知係太过紧张，定係专登诈傻，竟然话唔识自己拣嘅作品，激到Huber当场“反面”扮嬲，气氛欢乐搞笑。

　　

 

 

 

　　

　　冇除衫照样有heart

　　

　　

　　平时对大家都“有求必应”嘅Hubert，喺大家不停叫佢除衫show肌肉嘅起哄声下，终于忍唔住揼晒脚say no：“你哋係嚟听歌，定係睇我除衫？”台下“小熊”答案好统一，台上“熊君”好无语。但知道大家的小心思嘅Hubert，喺encore时就特意换上香港演唱会嘅限定服装上台，寓意陪住佢登台嘅靓衫，就同一路陪伴嘅歌迷一样重要。最后连比心、飞吻、大合照等戏码都做齐，俾咗大家一个超sweet嘅特殊之夜。“The DAY到此·开始”音乐会广州站圆满落幕，好多未能如愿到现场嘅“小熊”，都急不及待想知Hubert下一站演出几时再有。想知更多“熊君”动向，记得密切关注下Color啦！