|
|
|
|
|
|
|
|
|
|
|
|
新一岁，新气象，19岁的Color也要搞搞意思！平时教大家扮靓、变时尚嘅“靓Club”栏目都趁机全面升级，从原本嘅纯版面呈现，落实成为线下体验，带大家沉浸式玩转时尚。可乐君仲邀请到艺人梁琤，同佢嘅时尚导师饶子怀，一起变身“星级时尚助力官”，为素人进行“星”级大变身。 郭玮/文 Color团队/图 改造前 甜辣自由切换 首期节目参加改造嘅素人嘉宾晨曦，本身係一位演员，同其他职业嘅人相比会更有镜头感。因为生得细细粒，笑容甜美，晨曦平时仲中意泡泡袖、百褶裙等等可爱风嘅装束，睇落就相对减龄稚气，有啲邻家小妹嘅气质。最近佢想转个look，星级时尚助力官就准备为佢打造一款辣啲嘅造型，希望可以提升佢嘅“星味”。 睇到晨曦平时嘅搭配都偏粉嫩，梁老师同饶老师都觉得，用深色系帮佢彻底反转“人设”可能会有突破。深咖色嘅连衣裙比浅色系列更稳重一啲，南瓜泡泡边嘅裙摆就可以延续佢嘅可爱风，令整体唔会过于成熟，小吊带嘅风格可以露出最显瘦嘅锁骨同天鹅颈，满足晒佢想变得“辣辣哋”嘅愿望。带金属扣嘅方踭小皮靴可以拉长腿部线条，同短裙搭配亦可以提升活力同时尚感。 突出视觉焦点 除咗服装搭配之外，梁老师同饶老师都针对晨曦嘅妆发，俾出咗专属建议。晨曦嘅自然小麦肤色本身就自带辣妹属性，因为肤质唔错，老师就建议佢平日唔需要将粉底打得太白，保持原有嘅肤色可以令到整体更加自然。晨曦嘅五官同脸型都比较完美，唔需要太多修饰，所以老师帮佢设计咗干净利落嘅眼线，增加眼部嘅深邃感，眉毛基本按翻原始眉形填充颜色即可，最后再加翻少少眼影点缀，眼妆部分就已经够晒。 发型方面，晨曦原本嘅发色已经係渐变嘅金色，搭配深咖色嘅连衣裙就好啱key，老师将佢原本比较贴面嘅直发，夹成柔顺嘅大波浪，视觉上增加层次感，令发量更丰盈亮泽，整体就会变得更有质感。因为通体嘅搭配都偏沉色，最后只需要增加一对亮色夸张嘅耳饰，就可以将整体视线聚焦係上部，令model面部成为视觉焦点。 梁琤、饶子怀 星级时尚助力官 香港艺人梁琤与造型大师饶子怀，一同为Color全新升级嘅节目助力，首次“出征”就大成功。未来梁老师表示自己将会喺演艺圈继续深耕，尝试更多不用角色，而饶老师会把关剧本，务求令佢嘅角色发挥得更好！
改造后
"星级时尚助力官"
