陈镜淳：人细鬼大讲古仔

　　前段时间，由南石头街道联合羊城晚报主办的“寻找青春印记·唤醒南石力量”故事会演讲大赛入面，一位人细鬼大嘅“讲古仔”成功吸引咗大家嘅注意——讲古界新星、9岁大嘅“淳宝”陈镜淳。咪睇佢人仔细细，其实佢经验丰富，係讲古圈中嘅小红人。就等我哋一起，听淳宝讲讲佢自己嘅故事啦。

　　谢飞/文   受访者提供/图

 

　　小小明星

　　虽然淳宝依家得9岁，但佢从4岁开始，就已经接触电视广播行业。仲读紧幼儿园嘅淳宝，被老师发现佢精灵活泼、口才了得，就发掘佢去参加电视综艺节目。好似《粤韵风华》《青春开学礼》《透过镜头看非遗》等广州街坊都好中意睇嘅电视节目，经常都会见到佢嘅身影。今年春节前，适逢北京路花市重开，淳宝喺现场表演粤语讲古，吸引大批路人捧场！除咗係电视框中嘅小红人，淳宝仲join过好多比赛，诗朗诵、讲古仔、行catwalk、真人秀等各种类型比赛都参加过，尽show自己嘅多才多艺，唔少仲攞咗好叻叻嘅名次添。

 

 

 

 

 

　　新讲古人

　　淳宝的讲古才艺，师从粤语讲古艺人彭嘉志，当时，淳宝同彭老师一起录制节目，咁啱就係关于拜师学艺嘅情节，于是乎两人就顺势结为师徒。淳宝一家係地道嘅广府人，日常生活都係讲粤语嘅，深知粤语传承嘅意义，同时佢哋亦都好希望通过自己身体力行，为传承呢份传统文化做出贡献。粤语讲古，已经从过去嘅茶楼听书、收音机听连载，演变到网络随开随有，多渠道发展。而层出不穷的讲古比赛、交流活动，也令到呢项传统玩意儿不断玩出新花样。年纪轻轻嘅淳宝，成为新一代粤语讲古人，正正体现出粤语文化在不断被传承的过程中，不断有新血加入、有新力量输出，历久弥新的强大生命力。

 

 　　姚焕然老师指导淳仔  

 　　  多才多艺

　　由于爹地妈咪都係艺术专业出身嘅，对淳仔中意学的才艺都好支持，淳宝从细就好有表现欲，唔怕喺陌生人前表演。除咗口才了得，淳宝仲精通十八般武艺，街舞、钢琴、画画、烘焙、武术等无一不爱。不过，淳宝话学习越嚟越紧张，会暂时放下一些兴趣爱好，但讲古这个技能，佢话就一定会坚持学下去。

 

　　潮人小档案

　　姓名：陈镜淳

　　星座：巨蟹座

　　爱好：讲古、街舞、钢琴、绘画、编程等

　　威水史：

　　2023年“寻找青春印记，唤醒南石头力量”主题赛征文三等奖，演讲三等奖

　　2022年“穗港澳青少年文化交流季-粤港澳中小学生故事大会”粤语小学组故事精英奖

　　2022年“湾区少年说”粤港澳青少年交流展示三等奖

　　2022/2021年连续两年参与“广州开学第一课--青春开学礼”节目录制

　　2021年“非遗少年说”第二届广东非物质文化遗产青少年演讲展示优胜奖/人气网络奖