学运动健儿，操fit自己！

　　新年伊始，点样可以为自己注入满满活力？不如学下广东体育健儿，齐齐动起来，赢健康人生！位于省人民体育场旁边嘅广东体育博物馆，就係一个燃起运动热情嘅好地方——重温威水体育史，喺互动游戏中飙汗畅玩，玩出一身汗水、玩出欢乐，游玩之后令大家都觉得：我已经充满力量！

　　

　　

　　睇冠军点样“炼”成

　　

　　博物馆内收藏咗好多广东体育健儿嘅奋斗故事。冼东妹、苏炳添、樊振东等都係大家熟悉嘅运动员，佢哋参加比赛时穿过嘅“战衣”、签名装备、奖牌等都分类陈列喺展柜中，呢啲都係用汗水赢得的荣耀。每个展柜配有专属嘅大屏幕，循环播放佢哋比赛嘅画面，每当睇到冲刺瞬间，令人恍如亲临现场，心跳加速。除咗运动员嘅成长故事，连运动用品、场地嘅发展都好有意思：第一代排球係用棕色皮革做面料嘅，喺高寒山地穿嘅专业登山羽绒服，每个球队都有自己的特色……沿住展示橱窗细品体育故事、细睇展品，每个细节都讲述住运动演进嘅历程。行完一圈，唔单止见证历史，更似上了一堂“点样坚持”嘅实境课——新年要进步，就要学佢哋咁，一步一步“炼”出嚟。

　　

　　

　　

　　舒筋活络迎新年

　　

　　二楼嘅体育游戏互动区，先至係让大家真正“动”起来嘅地方，快去用运动唤醒身体！足球射龙门游戏係单人竞技，作为“球手”，你要精准预判“守门员”接下来嘅动线，提前对“射球”角度作出调整，争取正中龙门得分。羽毛球赛分单人挑战与双人PK赛，单人接受电脑对手挑战，佢哋发球可谓快、狠、准，可以锻炼你嘅专注力；双人赛更灵活刺激，你可以同“对手”约好，打默契嘅你来我往“友谊波”，或者开启“杀球”模式，打对方一个措手不及，玩几个回合都打到难分难解，令人欲罢不能。体育知识抢答最考知识储备量，每题都含有大量信息，等你玩完一转，你嘅“体育知识库”唔知唔觉又充实咗！小游戏睇似运动量唔大，啱好令人微微出汗，全身筋骨舒爽晒。三楼环形影厅轮播历届运动会开幕盛况，企喺影厅中间，沉浸式声画让你恍如置身万人场馆，心潮澎湃。

　　

　　Keep住运动精神

　　

　　博物馆有呢几个打卡位，不容错过！博物馆入门处，红飘带围绕银色运动员群像雕塑，係今趟体育之旅嘅第一个打卡位。雕塑由8个运动项目嘅运动员组成，寓意“敢为人先，永争第一”嘅体育奋斗精神，影相超有纪念意义。红墙“小金人”展示墙，视觉冲击力同样满分。流线型嘅展示架上，各种体育运动嘅模特儿展示动态肌肉线条，从滑冰切换到跑步，从跳水跳跃到排球扣杀、举重发力，每个造型定格咗力量爆发嘅瞬间，睇完令人热血沸腾！喺最高楼层有个隐藏打卡位——从电梯间进入展厅嘅见到的第一个窗口，可以望到“省体”内部全景，绿茵草地、酒红塑胶跑道，仲有亮眼嘅蓝色观众席座位，配色抢眼又和谐。就算冇比赛，喺高处望下整洁宽敞嘅运动场，都即刻心旷神怡。