Mr.：冲破难关，活出我自己

　　

　　2026 年广州首场热血又温馨嘅摇滚 show，一定係由 Mr.乐队 DASH、MJ、Ronny、Tom 带来嘅“轻狂岁月”音乐会最终场。由中山首站到今次收官，Mr.重聚嘅半年里，Color一路相伴，陪住大家重温佢哋岁月里嘅轻狂。

　　

　　甜蜜表白

　　

　　演出以《我总会愿意》开场，歌声里既有对旧日挚友嘅怀念，亦有对如今重聚嘅感恩，更寄托住未来继续同行嘅愿望。全场观众都係Mr.嘅“狂迷”，亦成为演出嘅“主唱”，大家齐声合唱经典，已成所有人默契嘅演绎。来到“轻狂岁月”最后一站，大家纵有千言万语嘅不舍，但DASH话，所有想讲嘅嘢，都喺Mr.嘅音乐中，唱俾大家听。喺当晚嘅舞台上，Mr.首次献上新歌《绿野仙踪》Live版，纯粹嘅木吉他配以悠闲沙锤，民谣曲风带观众回到最初的记忆中。大屏幕同步播放MV，四人喺树林、球场、草地自在唱歌嬉戏，如孩童般无忧无虑。呢首歌同Mr.以往嘅热血摇滚好唔同，係少有嘅甜蜜小情歌。曲词创作兼主唱MJ话，要特别唱俾女朋友听。MJ讲嘅时候腼腆又得戚，睇得出佢创作时满载爱心。歌中唱到：“一直去爱，而你是我生命答案”，亦呼应返DASH曾喺Mr.首个重聚舞台上讲过嘅“有爱嘅地方就有Mr.”，温柔表白经历过“轻狂岁月”嘅你我他。

　

　

　　活出自己

　　

　　再次同Mr.倾计，Color君发现咗佢哋嘅变化：重聚后首个舞台，佢哋仍有少许不安；来到收官站，佢哋明显更从容自信。呢次巡演一路走过来，除咗工作团队嘅努力，最重要係所有“狂迷”嘅陪伴。DASH曾话佢哋都係平凡人，正因有大家嘅支持，先令佢哋变得不平凡。喺新嘅一年，每位成员都衷心祝愿大家身体健康，有健康嘅身体，先有机会玩更多音乐。“贪心”啲嘅DASH就希望Mr.可以变得更好。想将愿望“私有化”嘅Tom，则希望操fit自己，以更好状态迎接挑战，DASH同MJ即刻帮佢制定“减磅计划”，四人又开始嘻嘻哈哈。面对外界嘅声音，Mr.话最重视始终係队员心声，同时大家嘅意见同建议佢哋都收到了，改进不足、做得更好，坚持佢哋做音乐嘅初心。正如《轻狂岁月》所唱：“难关再多，也要活出我自己”，Mr.会坚持自己认为啱嘅事。

　　

　　

　　无限期待

　　

　　经常以各种形式同歌迷互动嘅Mr.表示，佢哋好想知道多啲大家嘅谂法，未来嘅日子，期待大家提供多啲idea俾佢哋，谂下点样一起玩、一起嗨。MJ知道大家好忙，但依然想努力一下，争取今年可以完成新专辑，俾歌迷新惊喜。Ronny话“轻狂岁月”巡演嘅收官并非结束，而係另一段新旅程嘅开始。不如大家同Color一起期待佢哋接下来嘅惊喜啦。