“三面玲农”祝你“风生水起”！

　　

　　麦玲玲与农夫FAMA曾合作歌曲《风生水起》，恰逢2025年係呢首作品面世20周年，佢哋三人重聚，组成“三面玲农”组合举行巡演。演出从广州启动，后来更冲出大湾区，所到之处都收获满满掌声。每个舞台，“三面玲农”都为观众送上欢声笑语、动听音乐与惊喜连连，新春将至，佢哋祝大家都风生水起！　　

　　

　　

　　

　　

　　

　　笑看人生一定得

　　“三面玲农”嘅舞台，主打一个“粤”听“粤”开心，用正能量talkshow串联粤语歌曲，同大家唱谈生活琐碎，用生活智慧启发观众。讲起呢首对佢哋嚟讲意义重大嘅《风生水起》，玲玲与农夫都话难忘20年前嘅“辛酸史”，嗰阵时嘅玲玲虽然薄有名气，但经常受到质疑；而玩rap嘅农夫更不济，户口剩低双位数，要问屋企人借钱凑够一百，先可以喺ATM机揿到钱出嚟。佢哋合作《风生水起》，本来係为咗自嘲命运，但估唔到呢首作品爆火，而佢哋嘅人生亦真係风生水起。歌词唱到：“罗庚最紧要睇得啱，人哋点样讲你都好闲。”係话俾大家知，唔好在意他人嘅睇法，相信自己嘅初心，为自己嘅目标努力坚持到底，终有一日会好似佢哋咁风生水起，成就自己嘅梦想。玲玲喺舞台上，对住所有观众竖起大拇指讲：“你哋一定得！”可以讲，呢句係佢俾大家最好嘅新年祝福。

　　

　　唱出成就靠坚持

　　《风生水起》收录喺同名专辑里面，农夫凭借呢只专辑斩获“新浪直播室最高收视大奖”“最佳组合”“最佳嘻哈艺人”“叱咤乐坛奖”和“叱咤乐坛我最喜爱组合”等大奖，农夫有今日嘅成绩，除咗係佢哋擅长将生活融入作品、容易引发大家共鸣之外，更係佢哋一直坚持创作，用粤语作品传递正能量嘅回报。麦玲玲以自己独到嘅个人魅力，跨界影视、综艺、舞台，如今被誉为香港最具标志性嘅文化人物之一，佢有独特观察力与智慧，善于将传统文化同现代生活结合，口齿伶俐为大家做人生指引。时隔二十年再唱《风生水起》live，大家觉得佢rap都完全冇难度，农夫笑称：“因为玲玲练咗廿年呢首歌……”睇得出，佢哋嘅成功都係坚持不懈努力嘅结果。

　　

　　凡事都要向“好”谂

　　“三面玲农”每站嘅演出，几乎都有惊喜嘉宾助阵。首站嘅张继聪，佢为大家送上正能量提示：塞车好，因为可以睇耐啲风景；俾人闹好，证明有人关注。凡事都向“好”谂，人生会变得更好。广州站加场嘅嘉宾王菀之，同农夫回忆过去时，仲一齐合唱冷门情歌《爱不爱我》，向全场观众表白。江门站嘅吴卓羲，与麦玲玲合唱《别怪她》，造就玲玲继《好好恋爱》后又一首经典合唱代表作。每一站嘅“三面玲农”，都让现场观众笑声不断、感动不减、感慨不停。嚟到新一年，麦玲玲与农夫FAMA会带住“三面玲农”演出继续出发，3月8日佢哋会喺吉隆坡同大家见面，让更多人同佢哋一齐风生水起。