佢係《飞虎》中心思细密嘅技术宅，又係《法证先锋5》中感性专业的女法医，最近佢又在新剧中变成商界女强人身边嘅得力助手……戏路百变嘅蔡洁可甜可飒，深受观众喜爱。佢仲係Color嘅fans，今次换个身份嚟做可乐君嘅friend！hello，蔡洁。

　　郭玮/文 受访者提供、剧照/图

　　戏里戏外好有缘

　　在新剧《廉政狙击》中，蔡洁戏份唔多，饰演嘅係女主角胡定欣的左右手。其实，蔡洁同胡定欣喺入行之前就已经认识，不过直到今次，佢哋先真正合作。组成“复仇者联盟”嘅佢哋，被观众大赞有CP感，蔡洁就当大家认同咗佢嘅演技，佢话：“我好难去评价自己嘅表现，观众中意我就觉得好开心！”同样戏里戏外都係friend嘅仲有黄宗泽Bosco，在拍摄紧嘅《驱魔龙族马小玲》中，佢哋又一次搭档，默契越来越好。蔡洁直言呢个friend见证住自己嘅成长：“《飞虎》嘅时候我比较青涩，Bosco会俾意见我，依家我哋可以互相碰撞出新主意，更加好玩了。”讲到friend呢家嘢，原来可乐君同蔡洁都係缘分颇深嘅老友记——蔡洁提到，自己读高中嘅时候会买《可乐生活》嚟睇，今次居然成为报纸嘅“封面人物”，感觉真係好神奇。

　　表演热忱冇变过

　　入行咁多年，蔡洁都觉得自己变咗好多，以前做人会比较浪漫，天马行空咁追梦，依家嘅佢就变得实在好多，因为佢觉得：“青春流逝啊，可以拼搏嘅时间真係少咗。”以前成日心思思想试多啲新嘢，依家反而会将精力focus喺选定嘅目标上，蔡洁相信只要脚踏实地努力，一定会有回报嘅。佢都承认做艺人真係辛苦噶，但佢又真心中意做呢行，学识咗取舍、追求自己嘅坚持，係蔡洁入行多年最大嘅成长。而始终冇变嘅，就係佢对表演、对创作嘅热忱，毕竟唔係中意就好难坚持，佢好希望可以大量参与好的作品。

观众认可最重要

　　无论戏份多少都认真准备，尽力去做好每一个角色，係蔡洁作为演员嘅工作原则。喺之前热播嘅《法证先锋5》中，佢首次挑战“法医”角色，就特登提前买书预习，揾咗相熟嘅医生朋友帮手，令自己演戏嘅时候更加似法医，不过蔡洁又话，最难嘅唔係呢啲“专业嘢”，而係自己嘅角色喺剧情中会有好多“感情线”。有“法证铁三角”之间嘅友情，又有师生之间嘅怜悯，仲有同邻居错误萌芽嘅暧昧……因为係搭档唔同演员，蔡洁希望每条线都有不同嘅演绎，令角色更立体，所以都落咗唔少心机。每次投入一个工作嘅时候，蔡洁就会要求自己先做好眼前的事情，如果观众觉得呢个镜头够精彩，佢就当完成咗自己嘅KPI啦：“攞奖当然係一个荣誉，但唔好强求太多，做好作品更重要！”

　　有个做导演的梦

　　讲到今年嘅大计，蔡洁就希望可以将自己写嘅剧本拍成电影，实现自己做导演的小梦想。除咗呢个大project，佢都仲有好多小目标嘅，例如想要养成早睡早起、保持运动等健康生活习惯。过去一年，少咗对屋企人嘅陪伴，係佢觉得最遗憾嘅事，“但係要工作，谂办法去平衡啰。”蔡洁特别感恩家人对佢嘅支持，仲有一直陪住佢嘅支持者，呢啲都喺佢不断进步嘅动力。