兔年第一波乐坛新星，嚟报到啦！有玩浪漫电音嘅单眼皮小哥哥，有sweet到漏嘅全能萌妹，更有虚拟世界首支twins音乐组合，佢哋个个都多才多艺，用个性旋律带大家嘅耳仔去旅行，唔知边款会係你pick嘅“潜力股”咧？

　　郭玮/文 经纪公司提供/图

　　电音浪漫

　　吴东濠年纪虽细，但野心好大，细细个就中意音乐嘅佢，对音乐怀有坚定不移嘅初心。喺广州土生土长嘅佢，21岁嗰年参加“放飞梦想”全国艺术人才选拔大赛，获得咗广东赛区金奖嘅好成绩。之后，东濠不断努力实践，前前后后花咗三个月时间打磨， 终于喺今年年初，推出自己嘅首只原创国语单曲《浪了一点漫》。佢喺传统R&B曲风中，加入咗电子同埋swing嘅元素，令作品增添咗迷幻色彩。作品中更创新地插入西班牙语rap，令到歌词所描绘嘅若即若离关系更加细腻。MV中佢仲变换多款造型，演技派“酒保”呆萌暖心，舞功超人嘅dancer则魅力四射，向大家展示佢嘅多面向。细细品味《浪了一点漫》，大家能聆听到佢独特嗓音中，不一样的浪漫。

　　全甜宝藏

　　拥有软萌外表嘅虾甜甜，却藏住无比强大嘅能力！演员、模特、歌手都係佢嘅身份，唱跳俱佳嘅佢曾经係女团成员，用“宝藏女孩”嚟定义佢，真係一啲都不为过。虾甜甜嘅贪玩爱笑，让首次接触佢嘅人都会被佢外表甜到；而进一步了解佢，大家亦会被佢坚持不懈嘅追梦之心感动。佢嘅座右铭係“脚踏实地”，要求自己要跳出舒适圈、keep住向前走。最近，虾甜甜正在筹备自己嘅个人原创单曲，人生本来就不应设限，有梦女孩的未来尤为可期。唔知呢位咁宝藏嘅追梦女孩有冇touch到你咧。

　　猫生twins

　　近年虚拟偶像越来越heat，twins组合有得天独厚嘅话题优势，新twins音乐组合C-kiz结合两个“大热”，唔知大家又like唔like咧？据介绍，佢哋嘅诞生纯属意外，宠物猫出手帮突然“宕机”嘅程序员完成咗代码，于是一对性格迥异嘅虚拟姊妹花就此面世。性格文静的姐姐“方蔓”爱传统文化，鬼马好动的妹妹“方洛”中意四围探店，而音乐就係两姊妹嘅共同爱好。佢哋同所有后生仔女一样，贪靓爱玩、中意甜食，得闲仲会去“潮到风湿”嘅东山口打卡影相添。今年春节，姐姐“方蔓”登上广州台元宵特别档《锦绣湾区一家亲》的舞台，与本土歌手阿细共同演绎咗歌曲《细界》，造就咗广州台首个真人搭档虚拟偶像嘅演唱节目。初次探索现实世界，C-kiz有啲小心翼翼，相信不断尝试、慢慢成长之后，佢哋会有更多惊喜俾大家。