万物复苏的春日，好啱谈情说爱！有冇一个人，让你一见到佢就嗒嗮糖？被人抄牌未必係坏事？情侣分手、复合关个煲乜事？喺粤语入面，拍拖原来咁多花臣，柴米油盐都尽化做浪漫甜蜜，想要脱单嘅同学，快啲嚟学习！

　　陈祉伶/文、图

　　钟妲彤、夏钜恒/模特

　　嗒糖　　

　　dab1 tong4

　　粤语中的“嗒”，可以指用舌尖尝味道时，舌头与上颚接触发声的动作，也可指食嘢时发出嘅咂嘴声。“嗒糖”本意指嘴里含着糖果，后引申为“心里美滋滋”嘅意思，通常用于形容见到心仪对象嗰阵，满心欢喜嗰样好似食咗糖果咁甜蜜。粤语中形容春心萌动，仲有好多盏鬼嘅讲法可以，例如“起痰”“生滋猫入眼”“十月芥菜——起心”等。

　　造句：佢见亲你都嗒嗮糖咁，肯定係钟意你啦。

　　抄牌　　

　　cao1 pai4

　　“抄牌”呢个讲法，本意指警察对违章车辆作登记处理时，会用一个纸笔记录下车牌等相关信息。而延伸的含义，就指某人主动向异性要联系方式，因为用纸笔记下对方电话号码嘅动作，同警察抄牌好相似。到咗今时今日，男女抄牌的方式都upgrade咗啦，唔使用纸同笔，打开微信扫码加好友就得啦。

　　造句：你想识女仔，主动啲去抄个牌先啦，唔係点有“然后”啊？

　　靓女，可唔可以俾个num我啊？

　　呷干醋　　

　　hab3 gon1 cou3

　　粤粤语中嘅“呷醋”，一般指男女关系上的忌妒情绪，“呷干醋”则比前者更带诙谐意味，亦有无根据地猜忌的意思。对于呢句俗语嘅出处，如今已经比较难考究到权威的讲法，不过醋嘅酸味，同忌妒情绪产生的酸涩感类似，用起身都几生动形象噶。如今，“呷醋”一词往往不局限于用在两性关系中，亲密的朋友、家人之间都可以用嘅。

　　造句：对我嚟讲，闺蜜一样好重要，你做男朋友嘅就咪乱咁呷干醋啦！

　　箍煲　　

　　ku1 bou1

　　在广府人嘅观念中，两个人一旦结合就应该“同捞同煲”。“掟煲”就係指将个煲丢远或打烂，形容夫妻或情侣之间感情破裂，决定分手。旧手艺制作的砂锅容易开裂，一般会用铁线把裂砂锅紧紧地箍扎起来，使裂缝变小，再用蛋清或米饭涂抹裂缝，火烧后即可继续使用。所以大家又用“箍煲”比如夫妻或情侣之间，采取措施修复已有裂痕嘅关系。

　　造句：道歉都咁冇诚意，想成功箍煲都几难咯。

 　　原谅我啦，

　　BB~

　　撑台脚　　

　　cang3 toi4 gêg3

　　“撑抬脚”係指两个人、尤指夫妻或恋人亲昵地同台共餐。呢个讲法源于情侣面对面食饭时，双方对脚在台下，都要甜蜜地“依偎”在一起嘅暧昧小动作，係夫妻或情侣秀恩爱嘅经典方式。 到了现在的实际使用中，呢个词也泛指二人用餐，可用于朋友、家人之间，不一定有暧昧的含义。

　　造句：扮到鬼火咁靓，一落班就急急脚走人，係咪赶住去同人撑台脚啊？

　　电灯杉挂老鼠箱　　

　　din6 deng1 cam3 gua3 lou5 xu2 sêng1

　　以前嘅电灯柱多数用杉木造，所以会被叫做“电灯杉”，而旧时卫生条件唔多好，为清除鼠害，街道会在电灯杉上挂装有消毒药水嘅“老鼠箱”，用于收集死老鼠，以免造成卫生隐患和疾病传染。“电灯杉挂老鼠箱”呢种当时司空见惯嘅现象，后来被大家用嚟比喻一高一矮嘅情侣。过去，唔少人会觉得高矮悬殊係唔登对，如今，则有好多朋友仔钟意呢种“最萌身高差”。

　　造句：佢哋两公婆真得意，好似电灯杉挂老鼠箱咁，一高一矮。