从地铁一号线长寿路站出来，附近的恒宝广场、宝华路、永庆坊……都係广州潮人中意打卡嘅地方，吃喝玩乐、行街买衫、影相打卡，蒲足一日都冇问题。而从恒宝广场北门出来的宝源路，虽然只要500米嘅长度，却係一条满载老西关记忆嘅宝藏旧街，就经常被我哋忽略咗，趁3月初紫荆花开嘅季节，最啱去打卡。

　　王敏/文 陈秋明/图

　　处处係西关印记

　　宝源路位于老西关腹地，东行直至宝华路，西向就係荔枝湾景区，以佢为出发点慢慢逛，仲可以到恩宁路、泮塘五约、或者逛到上下九步行街添。唔讲可能大家都冇注意，宝源路仲係广州历史建筑分布最为密集的街道之一，佢同宝华路、多宝路并称为“西关三宝”。流连宝源路，你转头就会发现木制嘅趟栊门，抬头见到五彩缤纷嘅雕花玻璃窗，低头见嘅係历经岁月依然坚硬嘅青砖石脚，小小店铺里不失威武嘅醒狮等，呢啲构成老西关特色魅力嘅古老印记，尽管经历数十、数百载，自豪咁向街坊诉说自己嘅威水史。

　　喺明末清初嘅时候，宝源路呢边係发迹商人钟爱嘅居住地，建筑风格除咗大体保留传统西关风格之外，唔少细节都融入西方元素，中西合璧极具特色。好似打卡坐标“明勤第”咁，趟栊横木mix罗马石柱嘅设计，从古至今都唔会显得违和；欧式拱券和木框花窗嘅搭配亦令人觉得赏心悦目。宝源路101号民国老宅，更係完美演绎了东西方美学嘅平衡，始建于1910年前后嘅佢，采用咗当时好新潮嘅欧式立体前凸设计，但同时又keep住最传统嘅满洲窗，今日睇嚟，都仲係旧屋改建嘅经典模范。

　　宝藏老街有潮味

　　喺岁月嘅洗礼中，宝源路保留传统嘅生活痕迹，又增添新颖嘅潮流元素，乍眼看似古旧嘅陈列，细睇会有大大嘅惊喜。游客喜欢过来一探岁月静好的潮流生活，而老居民嘅生活没有被过多打扰，呢条宝藏老街亦就有咗源源不断的生命力。3月气温回暖，宝源路嘅紫荆花会为佢增添一抹娇嫩嘅粉红色，到时候去打卡会更加靓。

　　现时嘅传统骑楼里面，有咗好多潮流仔女中意嘅元素。例如充满猫猫元素嘅发廊，已经静鸡鸡喺度开了好多年，听讲佢擅长嘅款色，可以复古可以朋克，而且实行预约制嘎！推开通花老木门，饮茶倾计嘅靓姐，同蹭网打卡嘅后生仔女和谐相处，进口冬阴功与中式焖牛腩亦唔冲突，成就咗一间间美味嘅网红食肆。学生哥路过，会驻足路边小店小摊，茶叶蛋、渌面筋呢啲“小学鸡”味道，永远唔会过时。后生仔女行攰咗就入咖啡店、茶饮店hea下，饮杯冷饮过下口瘾，路过赞记都会好奇咁问东问西，买个嫁女饼当零食……宝源路上的美食都係新旧相容、中西互补的，选择好丰富。