广东人将养生之道刻入DNA，今时今日，更成为后生仔女嘅一种生活态度。熬最迟的夜，敷最贵的面膜；出去蒲，背脊贴满药膏；就连手中嗰杯用来“续命”嘅奶茶、咖啡，都要加入中药材，饮起身有种独特嘅养生滋味。

　　饶禧/文 饶禧、品牌官网/图

　　过足奶茶瘾

　　主打“药食同源”嘅中药奶茶，係养生人士嘅首选饮品之一。以前饮中药时，想过下奶茶瘾又惊影响药效，饮得多奶茶，又惊脾胃湿寒要去睇中医。依家将两者合二为一，喺美味奶茶中加入五指毛桃、枸杞、红枣等滋补养生嘅中药材，既可以过下嘴瘾，又可以起到养生功效。呢间广州首家中药奶茶店“茶宫煮”，门口摆满中药材，飘来阵阵药材香。店家会根据客人嘅需求，推荐唔同功效的中药奶茶。适逢龙舟水，广州人湿气重，嚟翻杯“五指毛桃祛湿奶茶系列”，仲有抹茶、椰乳等茶底可以选择。入口有淡淡嘅五指毛桃药材味，加上咬开爆汁嘅薏米爆珠，满足感拉满。而店内首创嘅人参乌龙，将一整根长参放入，搭配减脂润肠嘅雪燕，大补元气，最啱熬夜人士饮啦。如果惊药材味太浓，可以选择中药水或者中药果茶等等。

　　茶宫煮·药食同源奶茶（天河南店）

　　地址：天河区天河中心天河南一路92号102房

　　营业时间：周一至周日10:00-22:00

　　猎奇“中式啡”

　　咖啡与中药嘅梦幻合璧，激起唔少人嘅好奇心。凉茶品牌王老吉，前几年已经紧跟潮流开设“凉茶系”奶茶店。最近王老吉仲同KFC联名，嚟咗款“王老吉风味气泡美式”，係真正意义上嘅“冰中式”。凉茶的清爽、气泡水嘅刺激同咖啡的香醇，形成强烈嘅反差感，口味够嗮奇特。广州掀起嘅呢种养生混搭风，已经“蔓延”到传统嘅医馆，例如北京同仁堂旗下品牌推出养生咖啡：枸杞拿铁、当归奶咖，仲可以加入养发的芝麻、养颜的桃胶。后生仔女再都唔使左手枸杞、右手咖啡，可以一杯搞掂。

　　养生柠檬茶

　　广东人有乜唔妥，第一时间都会谂起凉茶。越苦越爽嘅癍痧，往往令人却步，咁就不如试下其实可以试下养生系嘅柠檬茶。“周容记”就有好多款Mix凉茶嘅柠檬茶。祛湿木棉青柠，就将木棉花同清爽的柠檬煮埋一齐，饮落沁人心脾又可以祛除湿气；甘草舒颜柠绿，就喺经典柠檬茶中加入甘草，甘草香味停留喺喉咙中，够嗮清爽，最啱天时暑热饮一啖，据说如果喉咙痛、声音沙哑，仲可以帮手清热下火。除此之外，呢度嘅柠檬茶仲会加入薏仁、桑叶等药材，大家可以根据自己需要选择。