《国际环境健康研究杂志》刊登的一项研究表明，每天在户外待上一小段时间，能让人感到更加快乐。即使不做运动，每天到公园待20分钟，也会使人状态更好。“公园20分钟效应”火热出圈。嚟到广州呢个“大花园”，你想去公园真係话咁易！截至2020年底，广州市列入名录嘅公园就有270个，大嘅主题公园，细嘅口袋公园，佢哋各有特色。今次就同大家去身边的公园take a break，转个环境，用唔同嘅主题帮自己power up啦！

　　郭玮/文、图

　　再见Dear Friend

　　喺大家儿时嘅玩伴中，Hello Kitty嘅身影实唔少。晓港公园亲子乐园，係广州拥有最多Kitty大公仔嘅地方，恰逢今年又係Hello Kitty 50周年嘅诞辰，园区就特别将佢哋翻新洗净，供大家影相留念。穿粉红礼服嘅Kitty，同穿西装叼烟斗嘅Daniel被组成CP，穿白色裙嘅kitty头上有彩色花花点缀，仲有kitty怀抱朋友仔小熊……喺呢个公园里面，搵齐14个kitty，“听”呢啲儿时玩伴讲故事；坐喺鳄鱼公仔身上放空，同佢嚟张童趣合影；体验各种趣稚机动游戏，做20分钟大细路，回味无忧无虑嘅童年。不过，晓港公园亲子乐园将喺7月31日结束营业，想去打卡嘅朋友仔，就要抓紧最后嘅机会啦。

　　睇下人生百态

　　越秀公园依山而建，里面绿树成荫，仲有3个人工湖，好适合散步、乘凉、放空。依家最吸引人嘅莫过于半户外嘅小剧场，观众席係围成大半圆嘅阶梯式座椅，复古嘅绿色特别养眼，点构图都好出片。无论係同闺蜜排排坐倾下心事，小情侣肩靠肩密斟，定係形单只影玩手机、唞凉，都特别有曾经放学后校园操场边嘅感觉。在小剧场嘅空地上，活力十足嘅姨姨优雅地跳广场舞，身姿矫健嘅伯伯灵活地踢毽子，仲有得意嘅小baby蹒跚学步、开朗嘅学童练踩单车……坐喺观众席上20分钟，就好似观摩紧一部纪录片，过去、现在、将来嘅缩影尽收眼中。在小剧场旁边，越秀游泳场门口嘅小卖部挂住花哩碌嘅泳装，北秀游乐园有彩虹楼梯、旋转木马，人来人往驻足打卡，恍惚间好似回到无忧无虑的放学时间。

　　穿隧道探未来

　　如果有一条可以穿越时空嘅隧道，你希望见到边个时期嘅自己？海珠儿童公园新增咗一个交通主题园，里面有一条时光隧道般嘅迷你穿山隧道，未来感十足， 隧道内嘅墙壁有好多形状不规则、高低不同嘅窗洞，好似太空中嘅一个个虫洞。喺每个小窗洞望出去都係唔一样嘅风景，借住穿过窗洞嘅光束，光影大片轻松get。为咗配合小朋友视觉同身高，园区特别将所有嘅交通设备都等比缩细：隧道口嘅指示牌与人一样高，公路上嘅标识小而精致，迷你红绿灯仲会双色切换……喺呢度，小朋友可以轻松学识交通规则，大朋友可以探索一个迷你嘅未来小城市。如果你细细个嗰阵曾经梦想过做消防员，咁就唔好错过消防主题园区，嚟同立体消防车合个影啦。