电视剧《狂飙》带旺咗江门嘅旅游，但其实逛江门唔需要“狂飙”，慢慢逛更加可以感受到江门嘅魅力。侨乡百年建筑、老港风餐厅港味、时令海鲜的美好，只需要花一日时间就足够慢慢品味。

　　郭玮/文  黄译萱、饶禧/图

　　旧街新生

　　台山历史文化街区，有超过40条连片嘅骑楼街道、过千栋由民国时期保留至今嘅老骑楼。步入呢个街区，仿佛穿越时空，回到过去。片区曾经由归国华侨注资兴建小洋楼，历经数百年嘅风雨，依然保留住当年嘅婀娜多姿。雕花嘅围栏虽然斑驳，但仍然好立体；五彩玻璃封尘，但当年嘅绚烂依然若隐若现；旧时风光嘅大字招牌，同依家经营嘅小型五金店风格完全唔同，但仍可见威水同架势嘅气场。马路上係载货嘅van仔，屋檐下停住送外卖嘅电鸡，係时光喺度继续嘅证明 。有过百年历史嘅东风酒店仲继续营业，门面冇当年咁灯红酒绿了，但呢个片区曾经车水马龙嘅繁华景象，仲有唔少旧街坊记得——坐喺路边乘凉嘅老人会同你打招呼，闲话间仲会提起。

　　港饮港食

　　香港艺人古明华、汤俊明喺蓬江区江会57创意园里面，开咗间港风茶餐厅。呢个创意园保留咗80年代工业厂房嘅铁栏杆、水泥原色墙壁等，同原始嘅旧厂房、怀旧港风好夹。店内布置咗好几个特别有港味嘅打卡位，薄荷色嘅老款冰箱、红底红花搪瓷饭碗、经典港星怀旧海报，笨重占位嘅扭掣收音机……佢哋仲将正宗嘅港式茶餐味道带到呢度，餐蛋汤丁有麻油夹埋芝麻双重香口，“漏奶华”plus size更浓郁诱人，摩罗鸡腿香浓咖喱令人惊喜，经典奶茶浓而不腻全靠特色茶砖冰块。喺复刻嘅旧港剧环境里面，听住熟悉嘅港乐，品味正宗港餐，吸引好多人专程嚟打卡。如果够lucky，仲有机会遇到古sir、汤sir两位港星嘎！

　　限时美好

　　南海海域伏季休渔期结束后，台山嘅海鲜开启“味”力无限模式。秋风起蟹儿肥，又到食蟹好时节。台山奄仔蟹虽然冇大闸蟹咁多肉，冇膏蟹咁多膏，但佢胜在够嫩口，有肉又有膏，肉质鲜甜，蟹膏柔软顺口。原只清蒸嘅奄仔蟹，能最大程度保留蟹嘅鲜味，给你一口清甜；盐焗奄仔蟹用高温锁住蟹汁嘅同时，令海盐透过蟹壳渗透至蟹肉，鲜蟹膏多咗一份咸香，蟹肉因为有盐稍微脱水，变得更加紧实，真係别有一番风味。中意重口啲嘅为食猫，要试下姜葱蒜爆炒开边奄仔蟹，蟹嘅鲜味同配料嘅香味好搭，镬气够猛，蟹甜、油香、烟火气全部上齐。肥厚嘅台山蚝都正当季，蒜蓉蒸过后有天然渗出嘅蚝汁，一啖海鲜、一啖鲜汤，令人回味无穷。