镜头里面嘅Joman蒋祖曼，俾人雷厉风行、硬朗嘅感觉，但现实中嘅佢，爱生活、中意搞怪、enjoy自由自在。佢话自己就好似一杯冻柠茶，看似酸涩无趣，但其实有啲甜又清新醒神，好有层次。

　　郭玮/文  受访者提供、剧照/图

　　最幸运是我

　　Joman被誉为“独立电影女王”，佢话以前几个人埋头做小制作电影，係学到最多嘢嘅时候。之后，由电影演员到参演舞台剧，再到依家嘅电视剧演员，每个转变佢都觉得自己好幸运，有机会尝试到咁多领域嘅工作。喺啱啱热播完嘅《法证先锋6》中，Joman首次尝试饰演有个性嘅模特儿，呢个角色既要有喜剧嘅幽默感，又要做好模特嘅体型管理，对Joman来讲确实係一个新嘅挑战。平时佢喺镜头前的形象係硬朗坚强、说一不二嘅，但佢坦言自己私底下冇咁自信，好彩有身边嘅人畀佢好多信心，佢先有机会出演咁多入屋嘅角色。Joman话喺前段时间，佢喺新剧《武林》中，终于有机会尝试到自己一直想试嘅搞怪茄咧角色，成功脱离自己过去俾大家嘅固有印象，大家可以期待一下哦。

　　做家人榜样

　　早几年，Joman嘅小朋友年纪细，佢就会希望摆多啲时间喺屋企。近几年小朋友大个咗，佢就觉得呢个时候，应该俾佢哋知道，做自己喜欢嘅事、努力追求梦想係好重要嘅。Joman话工作同生活其实好难平衡到，佢会喺工作嘅时候投入全部精力，回归生活就好好enjoy，咁样先可以成为家人嘅榜样 。Joman记得有前辈教过佢：要做好戏先学好做人。中意真实嘅佢从来唔会set人设俾自己，享受贴地生活係佢最中意嘅事。Color君第一次听到有人发自内心咁笑住讲：“我真係好中意返工！”去快餐店送外卖，到朋友嘅铺头帮手sell嘢，照顾小动物等等，都係佢曾经做过嘅工作。喺成为全职演员之前，Joman话自己会主动争取参与呢啲贴地嘅生活，接触不同的人和事，依家睇来呢啲经历其实对自己嘅演艺工作都好有帮助。

　　努力追目标

　　原来Joman一直有关注《乘风破浪》呢一类综艺节目，同样好期待可以参与其中，虽然佢谦虚咁话，自己除咗演技之外冇太多其他技能，但佢又坚信凭借自己嘅毅力同斗志，可以喺节目中揾到自己嘅位置。下一部新剧准备开机，Joman休息咗一排，佢正喺度努力调整作息，争取以最perfect嘅状态回归剧组。趁住空闲时间，佢会好好咁经营一下自己嘅社交媒体，努力拍片、影相分享畀大家，等更多人认识自己。果然，认真生活、好好演戏嘅蒋祖曼真係好似柠茶咁耐人寻味，自有一份独特嘅魅力。