面对未知嘅味道，我哋总是充满好奇与期待。而见到熟悉嘅字眼，我哋经常赋予佢既定的感觉：love是甜美，药是苦涩，藤椒是刺激……当舌尖遇到同设想中唔同嘅味道，有惊喜亦会有失望。最近可乐君在市面上发现咗一啲混搭饮料，睇落过瘾、饮落顶瘾，准备好同我哋一齐去冒险未呢？

　　郭玮/文、图

　　Love，好失望

　　呢款被网友誉为“恋爱的味道”嘅饮品，拥有令少女心动嘅粉红色外表，仲有充满诱惑性嘅红玫瑰做饵，吸引渴望体会爱嘅每一位“饮家”。话係充满恋爱嘅味道，大家都以为呢款玫瑰风味嘅草本饮料，会有玫瑰嘅香气加凉茶嘅甘甜，点知打开包装嘅瞬间，传来的竟然係略带塑胶味嘅玫瑰香精味，原本清爽嘅草本香同呢股香精味混合后，会让舌头粘附上一阵怪香，久久不散。说好的恋爱滋味呢？未免令人感到迷惑、失望。

　　藤椒，似漏电

　　“王老吉”由红变绿，青啤啤嘅包装清新又舒爽，形似提子嘅一串图案，原来就係令人舌尖麻辣嘅藤椒样式。试饮过呢款青提藤椒风味凉茶嘅网友话，佢入口酥酥麻麻，有电流划过嘅快感，令人充满期待。因为饮品有气，打开易拉罐嘅瞬间，果味会喺气泡疯狂涌出时散发，而入喉之后发现，青提果味唔够自然，产品配料表显示新品中含有赤藓糖醇、仙草、鸡蛋花、布渣叶、菊花、金银花、夏枯草和甘草等配料，就真系冇提到有青提汁。由藤椒提供嘅酥麻感，又被气泡水嘅刺激口感掩盖，可乐君冇feel到脷尖“过电”嘅酥麻，更似係漏电、“电力不足”的感觉。

　　QQ奶，係童年

　　呢个牌子嘅标志性大头公仔，係好多大小朋友嘅童年回忆：果味QQ糖 ，香甜有嚼头；原味装牛奶饮品，浓郁亦醇甜；奶味小馒头，酥脆又轻盈……每一款都係儿时嘅最爱。呢款新推出嘅青苹果味牛奶饮品，包装罐仲係同以前一样咁小巧，但是佢嘅外包装配色变成咗青绿色，令人熟悉又陌生。饮一啖，前调係细细个最回味嘅香浓甜牛奶味，比奶糖要更浓郁，同纯牛奶比又更香甜，慢慢回味，就可以feel到青苹果QQ糖嘅香味。呢一刻 ，係童年。

　　菠萝，够晒姜

　　提到菠萝味嘅饮品，大家印象最深嘅应该係菠萝啤饮料。而健力宝推出嘅呢款菠萝藤椒味汽水，包装上有个小恶图案，令“饮家”试味时都几紧张。菠萝藤椒味汽水入口仲係有浓浓嘅菠萝香气，劲似细个食嘅菠萝味零食，超足嘅气泡加上藤椒嘅酥麻一起刺激脷尖，爽感翻倍。呢款汽水嘅菠萝味底好甜美 ，又甜又辣，难怪Color团队有人饮出咗甜姜味。怕辣嘅朋友，可以冷藏或者加冰粒后饮用，降低气泡水嘅刺激感。

　　可乐，YYDS

　　广东有名嘅沙士汽水，因为有令人上头嘅风油精味而出圈，所以，当Color团队见到太极药业出品嘅藿香味可乐时，觉得佢哋会有异曲同工之妙。平时饮藿香正气水，辛辣嘅口感会冲击我哋嘅味蕾，因此喺初品尝之前，团队亦对呢款药字当头嘅饮料都会有顾虑。藿香味可乐开盖后，一阵气泡带出饮料嘅香味，係熟悉嘅可乐香夹杂咗少少草本植物嘅清新，入口后前调有可乐嘅甜，后调就係草本饮料嘅甘，唔刺激亦唔会无聊，令人惊喜。如果夏季嚟一杯冰镇藿香味可乐，定係十分解暑又解困。