广东好玩好食，手信包罗万象，嚟到就唔好错过“广东名物”。最近，有商场设置咗巨型食物模型墙，打卡时仲能闻到食物香气；广东特产“小强”成功“上位”，成为大家心目中嘅如意螂君；仲有逃唔过广东人餐台嘅鸡，都成功打入“手信圈”。接下来同Color君“尝”下佢哋嘅色香味啦。

　　郭玮/文   饶禧、品牌官网/图

　　“鸡”不可失咪执输

　　俗语有话，冇一只鸡可以逃出广东。为咗好好纪念每一只被送上广东人餐台嘅鸡，广宁玉雕鸡带着周边来袭：充满清新柠檬香气嘅“白切鸡”香薰蜡烛、姜味十足嘅“姜葱鸡”香薰，佢哋嘅造型细节到毛孔清晰可见，配色更係1:1还原“食材”嘅颜色，就算唔点着闻香，斋放住做摆设都好有个性。“鸡”系列盲盒锁匙扣更好玩，鸡同配料都係盲盒嘅一部分，可以根据抽出嘅“材料”烹制属于自己嘅料理：花雕配老姜係花雕鸡，麦芽糖加白醋係当红炸子鸡，柠檬椰子鸡新奇又受欢迎。白切鸡嘅周边玩到开晒花，石岐乳鸽都冇执输，店家设置咗可以卖“斩料”嘅柜台做打卡点，乳鸽毛绒公仔甚至可以去颈留髀斩件；东莞烧鹅亦跟上文创大队嘅步伐，喺最近嘅草莓音乐节首次亮相时就被抢购一空。广东人真係食到舔舔脷，玩得都好好味。

　　整色整水俏“螂”君

　　广东曱甴出名肥美大只仲晓飞，唔少外地人闻曱甴色变，但又对呢种“广东名物”充满好奇。玩具品牌方抓住商机，用“小强”形象打造IP，设计咗一系列嘅曱甴公仔，并赋予佢哋得意人设：曼妙迷人嘅兔女螂，有六舊腹肌嘅金刚螂，饱读诗书嘅读书螂，仲有打煲肽穿西装嘅绅士螂等等。虽然曱甴係害虫，但呢啲得意嘅造型，加上粤语嘅谐音玩法，成功帮佢哋洗白咗“黑”身份，“广东曱甴好想你”等标语，令人觉得鬼马又暖心。除咗曱甴之外，虾饺、烧卖、牛肉丸等广东饮茶必点点心，都被打造成文创周边，如果想选一款代表广东嘅手信，随手一拣都係焦点。

　　闻“香”观模识美味

　　广东美味多，料足味香、外形仲够晒吸引。有商场特别设计咗一面打卡墙，将几款好有代表性嘅广东美食放大做成逼真模型，唔单止配色同质感都整成高仿真，更喺每款食物模型旁边加设咗一个“出香口”。只需要揿下送香键，模拟食物嘅香气就会传出嚟撩拨你嘅味蕾：腊味煲仔饭腊肠油香四溢，底部嘅锅巴焦香咸脆；姜撞奶嘅奶香浓郁，淡淡姜辛味解腻又清新；豉汁蒸排骨咸香诱人，垫底吸满肉汁嘅香芋味道醇厚；金黄嘅菠萝油皮酥内里松软，夹心嘅牛油散发浓郁奶香味……款款美味斋闻香气已经够晒诱惑，加上咁靓仔嘅造型，打完卡令人忍唔住开晒胃口，想即刻揾间地道老字号开餐。