继猫仔、狗仔、冷血“萌宠”后，得意可爱嘅鸟类开始俘获潮人芳心，“撸雀”成为佢哋嘅新搞作。“撸雀”究竟有咩特别，跟住Color君一起去“鸟咖”同“雀仔员工”倾下计啦。

　　饶禧/文 黄译萱、郭玮/图　　

　　随心营业任意撸

　　沉浸式撸雀

　　位于北京路商圈嘅“鹦语角”，係近期hit爆嘅“撸雀”圣地。进入店内嘅第一步係进行一系列消毒，工作人员会同大家介绍“撸雀”嘅注意事项噶。店内装潢设计以暖黄色为主，精心摆放咗树木同站架，有秋千、滑梯，打造出一片雀仔嘅小乐园。门帘后有20几只小鹦鹉喺里面自由活动，据店员介绍，呢度嘅雀仔平均年龄係1岁左右，品种有玄凤、和尚、小太阳和牡丹。玩得开心时，随心营业嘅雀仔会飞落你头上、停喺你手上，呢个时候记得抓住机会，喺面前嘅落地玻璃镜同雀仔们影翻张合照。

　　性格好趣致

　　店内每位“雀仔员工”都有自己独属嘅名字同性格：成日旷工偷鸡嘅“胖胖”、偷偷公费拍拖嘅“麦乐鸡”以及社牛选手“皮蛋”……店员唔会过多干涉各位“雀仔员工”，任由佢哋自由发挥。店内仲根据盏鬼雀仔嘅性格设计咗特色周边，造型可爱又好玩。讲到开店初衷，主理人希望可以俾一啲钟意雀仔，但屋企条件唔允许养嘅朋友一个互动机会，一圆佢哋嘅“撸雀梦”，同时让未了解过手养鸟类宠物嘅朋友，有机会钟意雀仔。大家在结束繁忙的工作后，或者喺周末过来见到可爱嘅雀仔，抱着小鸟抱枕，心情都会好啲。

　　店名：鹦语角

　　地点：广州市越秀区越华路华宁里60号

　　营业时间：周二至周五 13:00-19:30 周六至周日 12：00-20:00

　　自带萌点“歪头杀”

　　全勤“打工雀”

　　由江南西紫龙大街行入到内巷，就会见到一个充满可爱元素的温暖小屋，企喺店门、窗边嘅雀仔“俘获”了不少路人嘅心。主理人做咗十几年“铲屎官”，大学毕业就带住自家雀仔一起开店。因为佢觉得雀仔们“偷感很重”，经常鬼鬼祟祟，于是主理人喺店名上玩咗个谐音梗，将鬼鬼祟祟改成“鸟鸟岁岁”，亦借此希望雀仔们岁岁平安。店内空间唔大，但布置得很温暖，有主理人自己拼嘅乐高，有留言板……“雀仔互动区”同埋“鸟类用品区”亦都分区明显。店内目前有18只“员工”，5种家养品种：虎皮、玄凤、牡丹、小太阳同和尚。“员工”们日复一日，做紧“打工雀”，每日10点半准时上班，晚上7点落班翻鸟笼休息。

　　同你做朋友

　　呢度平时会有好多鸟友带埋自己嘅雀仔慕名而来。店内嘅雀仔们都好醒目噶，会同新来嘅朋友们社交。讲到店内最出名嘅，当属明星“旺财”，佢自带罕有花色，属于小太阳品种，背毛望落似金太阳，斋企起度已经好吸睛。颜色靓、性格粘人嘅佢仲好识得营业，见到有钟意嘅瓜子就会主动转圈圈氹客人开心。有啲“员工”仲係自来熟，会好热情咁飞落客人脖头上。

　　店名：鸟鸟岁岁

　　地点：广州市海珠区江南西路紫龙大街57号101房

　　营业时间：周一、周二、周四至周日 10:30-19:00

　　“撸雀初哥”注意啦！

　　雀仔係攀禽类动物，佢哋嘅嘴就相当于我哋嘅手，想同你“互动”时会先上嘴。如果佢咬你嘅头发，係想同你亲近嘅表现，帮你“梳理头发”，係想同你互动做friend！