班马来广东过大年

　　过年啦，过年啦！广府新年有美味炸物，潮汕年味兴跳舞，客家人过年会排排坐，雷州文化点解花哩碌，港澳特区又有咩花臣……Color君帮大家搜罗晒粤港澳大湾区嘅新年玩法，陪大家开开心心过大年。想食好嘢、玩潮物、行靓街嘅朋友仔，班马嚟大湾区，齐齐玩转呢个新年啦！

　　策划：骆苹、曾敏妍

　　统筹：曾敏妍

　　执行：郭玮、黄译萱、饶禧、张子殷、秦丽莹、汤唯闻

　　广府人过年，又称为做年、过大年，係指以广州为中心嘅珠江三角洲地区，为咗庆祝农历新年形成嘅底蕴丰富的传统习俗。中意讲意头嘅广府人，过年习俗做咩事、讲咩话，都好有讲究噶。喺新春来临之际，跟住我哋呢份广府人嘅过年习俗，过开心广式年。

　　饶禧/文 羊城晚报/图

　　开油锅咩都有

　　按照广东人嘅习俗，过咗农历腊月二十，就要准备“开油锅”。喺粤语中，“油”音同“有”，“开油锅”就係“有富”“有油水”嘅意思，寓意来年全家人丁兴旺、衣食无忧。年廿四当日，长辈需要早起准备炸物：油角、煎堆、蛋散……一路炸一路讲吉祥话，油角要配“油角弯弯、家财百万”；煎堆就讲“煎堆碌碌、金银满屋”等等。一家人齐齐有讲有笑，炸好后就会摆喺度迎接新年！

　　蛋散

　　开油锅炸物糖环、煎堆

　　洗邋遢够企理

　　“年廿八、洗邋遢”，呢句从细听到大嘅俗语，相信大家都唔陌生。作为广府地区，“洗邋遢”嘅习俗係指农历十二月廿八前后，进行一次全屋彻底大扫除，寓意清理旧年嘅烦心事，希望来年可以事事顺利。最常用的清洁道具就有碌柚叶，因为碌柚叶寓意节节高升，越碌越有。将屋企嘅角落都清洁干净，就可以靓靓仔仔迎接新一年。

　　柚子叶

　　行花街买花戴

　　大年三十，广府地区除咗一家人齐齐整整食年夜饭，饭后嘅行花街都係传统节目之一。行花街起源最早可以追溯到明清时期，当时广东地区商业繁荣，花市兴旺，“花市”逐渐成为广东“四市”之一。喺19世纪60年代初，广州拆城墙开马路，“年卅晚行花街”慢慢就成为一项重要嘅新年习俗。喺“花街”上，大家可以买风车转好运，又可以买盘年花求富贵荣华。

  　　广州迎春花市

 　　逛花街

　　睇醒狮有财路

　　係广东过年，必定见到醒狮嘅身影。广东南狮，又称为醒狮，起源于广东南海县，之后流传于珠江三角洲一带。同注重形似嘅北狮唔同，广东醒狮会融合咗南拳技法，讲求神似，舞起身好活泼噶。作为驱邪避害嘅吉祥瑞物，过年敲锣醒狮，场面热闹。喺诸多舞狮套路中，“采青”係精髓之一，醒狮“食”到放喺高处嘅生菜，粤语中生菜音同“生财”，寓意生财利是、兴旺发达。

　　醒狮

　　采青

　　传统嘢变新潮

　　广府庙会係广东省汉族传统民俗文化，亦係近年来最能展示广府文化嘅“盛大嘉年华”。庙会通常喺农历正月十五元宵节前后举行，会设置各式各样嘅传统活动：舞狮舞龙、粤剧表演、展示传统工艺品。届时，大家可以一次过见识好多非遗技艺，成条街充满广府特色文化。我哋就趁住元宵节，一家大细出门感受热闹年味啦！

　　庙会

　　行通济无闭翳

　　通济桥係佛山最早兴建嘅一座大桥，当时佛山四面环水，原有的木桥无法满足大家带行李出行嘅需求，因此，大家都十分闭翳。通桥后，成功解决通行难题，自此就有咗“行通济，无闭翳”嘅讲法。依家每逢正月十六，佛山人就会一家大细，带住风车、风铃、生菜等嘅寓意吉祥物品，由北往南行过通济桥，祈求来年平平安安、顺顺利利。

　　佛山“行通济”

　　通济桥