|
|
|
|
|
|
|
|
|
|
|
|
|
|
|
|
|
|
|
|
|
|
|
|
天气就越嚟越热，出去打个round即时就身水身汗，个人一热起上嚟，连个脑转数都慢啲，脑闭塞就係一瞬间。平时开工三两下手势就搞掂嘅嘢，而家做到乱晒龙，真係搞到人箪咁大个头啊！喺粤语入面，仲有唔少形容呢种脑闭塞状态嘅词汇，一齐嚟学下啦！ 彭琳/文 彭琳、江映姗/图 等等、许家铃/模特 盲摸摸 mang4 mo2 mo2 “盲”即係睇唔到咁解，睇唔到嘢都仲要摸嚟摸去，就算畀你摸到都唔知係咩啦！所以喺粤语入面，盲摸摸就係形容视力不佳，或者係唔了解情况、糊里糊涂嘅意思。 造句：“呢件事我都唔清楚喔，都係谂住盲摸摸咁做住先。” 乱晒龙 lun6 sai3 lung4 当你个开始闭塞，做嘢都冇乜心机，做到乱晒龙就梗噶了！“乱晒龙”呢个词喺粤语入面亦可以讲成係“乱龙”，佢嘅本字係“乱弄”。因为广府人将“弄”读成lung6，又因为“龙”发音係lung4，遂将“弄”写作“龙”，所以“乱弄”慢慢就演变成“乱龙”。“乱龙”呢个词就係用嚟形容乱七八糟嘅状态。而“晒”呢个字，通常都係用于动词或形容词后面，表示全部或彻底嘅意思，摆係“乱龙”二字中间，就加强咗语气，表示 “乱龙”程度之大。 造句：“你唔好喺度搞搞震喔，我啲文件畀你搞到乱晒龙啦！” 乌龙王 wu1 lung4-2 wong4 喺粤语入面，形容嗰啲做成日有甩漏嘅人，我哋就会用乌龙王呢个词。“乌龙”嘅本字係“胡弄”，同前面介绍嘅“乱龙”一样，因为广府人嘅发音问题，“胡弄”读读下就变成大家讲开嘅“乌龙”啦。“胡弄”喺古语入边亦可以写成係“舞弄”，有装神扮鬼或瞎折腾嘅意思。“舞弄”又可以简称为“舞”，喺广府俚语入面就有“舞出个大头佛”嘅讲法，形容搞出连串麻烦之后要人执手尾。到后来，广府人就用“乌龙”去形容做事糊涂。喺糊涂虫呢个界别都可以称王，可想而知呢个人到底有几甩漏啦。 造句：“你真係乌龙王嚟噶！呢张发票你又写多咗个0啦！” 三两下手势 sam1 leng5 ha5 seo2 sei3 个脑转数快嘅时候，做嘢就梗係好快手啦，三两下手势就搞掂晒啲嘢。 “手势”喺粤语入面有动作、技巧等意思，“三两下手势”所讲嘅“手势”就解作动作，表示用三两下动作就已经搞掂晒啲嘢。有夸张嘅成分喺度，不过就好形象咁表达到动作完成之快。呢个词就係形容一个人做事迅速，不费吹灰之力。 造句：“家下天气热，做嘢就自然慢噶啦，如果你开翻个冷气，我三两下手势就搞掂了！” 箪咁大个头 dan1 gem3 dai6 go3 teo4 做咗成日嘢，就因为个脑塞晒，结果咩都冇做完，搞到人箪咁大个头噶！广府人成日都讲一个词叫“头都大埋”，而“箪咁大个头”正正就係“头都大埋”形象啲嘅讲法。意思係指一个人绞尽脑汁咁思考问题，比喻烦恼之大。 “箪”即係盖箪，係竹编嘅装饭容器。广府俚语入面“箪”又会写成“斗”，所以我哋亦都可以讲成“斗咁大个头”或者“头大如斗”。 造句：“临收工先话有份计划书赶住要，临时临急咁，真係搞到我箪咁大个头啊！”
