|
|
实食冇黐牙 |
|
|
一脚踢 |
|
|
一眼关七 |
|
|
落手落脚 |
|
|
三扒两拨 |
|
|
执豆噉执 |
|
|
|
一年一度嘅母亲节啱啱过咗，唔知喺你哋心目中，妈咪到底係一个点样嘅形象？家务“一脚踢”？扫货“一眼关七”？将头家打理得井井有条？可以做到呢个份上嘅妈咪，绝对称得上係一位精明嘅主妇啦！所以今期COLOR会教大家几个可以形容精明主妇嘅粤语词汇，唔好等过节，日常都要多啲赞一赞屋企的“煮”理人。 彭琳、实习生 许家铃/文 彭琳/图 许家铃、彭琳/ 模特 一脚踢 yed1 geg3 teg3 一脚踢其实有两个意思，一个是全部、通通的意思，相信大家都遇到过大清仓嘅时候，售货员最中意叫你“一脚踢买晒佢”。当然，佢大部分时候係全部工作由一个人包办晒、冇助手帮嘅意思。对于唔少全职主妇嚟讲，每朝老公仔女出晒去之后，就得翻佢自己一个，冇条件请工人帮手嘅话，要打理家务，就唯有自己一个人搞掂啦！唔好以为好容易啊，全部都係日子有功咋！ 造句：“陈师奶认真犀利，成屋嘅家头细务都係佢一脚踢噶！” 一眼关七 yed1 ngan5 guan1 ced1 “一眼关七”嘅“关”係指注意、关照；而“七”表示嘅就係前、后、左、右、上、下、中七个方位。一眼要留意晒七个唔同嘅方位，可想而知呢个人睇嘢有几咁全方位。喺粤语入面“一眼关七”亦等同“眼观六路，耳听八方”，即係形容人可以同时留意、照顾多方面嘅情况。大家要谂谂，要做一个精明嘅主妇，睇嘢唔多几个心眼，点可以喺超市杀出重围啊？ 造句：“你阿妈我一眼关七，你有乜喐动我全部都睇得清清楚楚！” 三扒两拨 sam1 pa4 leng5 bud3 原本嘅意思係食饭迅速，扒两三下已经食晒。后来词义延伸咗，亦可以用嚟形容某个人做事快手，三两下手势就搞掂。家头细务睇起身容易，实际上好繁琐，唔快手快脚一啲，仲边有时间做其他嘢啊！ 造句：“呢单嘢如果搵我做，三扒两拨就搞掂啦！” 落手落脚 log6 seo2 log6 goek3 呢个词其实就係亲力亲为，任何事情都亲自出马去做嘅意思。作为一位精明主妇，柴米油盐水电煤，买餸煮饭洗衫晾衫，样样都要亲力亲为，真係唔容易！呢个词用嘅时候要注意，单係“落手” 冇“落脚”，意思会好唔同，指嘅係下手，例如话“教仔就教仔啦，落手咁重！”“落手打三更”，虽然有亲手做嘅意思，但实际係指比喻做事一开始就出差错。大家记得唔好用错啊！ 造句：“呢啲嘢叫人做就得啦，使乜落手落脚呀！” 执豆噉执 zed1 deo6-2 gem3 zeb1 意思係好似捡豆一样，因为豆好细粒，执嘅时候用手嘅话，就会好易完成，所以“执豆噉执”亦都用来比喻轻而易举咁对付某人或做好某件事。日日都係妈咪收衫摺衫，如果係你摺成头家嘅衫，冇返三五七分钟都搞唔掂，畀着係你阿妈，眨下眼就搞掂啦！ 造句：“扫地拖地，简直就係执豆噉执！” 实食冇黐牙 sed6 xig6 mou5 qi1 nga4 佢来自一句广府歇后语：“冇牙婆食糯米糍，实食冇黐牙”嘅后半句。冇牙嘅老人家食糯米糍，食完梗係唔黐牙啦，因为佢都冇牙。咁样一讲，係唔係形象好多？后来广东人就用佢嚟比喻做事有把握、办事干净利落，唔会有咩甩漏。 造句：“豉椒炒鱿呢味餸对于阿妈嚟讲，实食冇黐牙啦！” “点赞”
