|
|
老积（lou5 jig1）造句：“寻日饮茶撞啱张太同佢个仔，睇佢咁老积，一啲都唔似五岁仔。” |
|
|
吟噆（ngem4 cem3）造句：“自从我放暑假，阿妈日日就对住我吟吟谮谮，真係人都癫啊！” |
|
|
发狼戾（fad3 long1 lai6）造句：“讲多两句唔啱听，屋企嗰只化骨龙就发晒狼戾，做人父母甚艰难呀！” |
|
|
精叻（zeng1 leg1）造句：“陈太你个女真係好精叻喔，次次家长会老师都表扬佢！” |
|
|
心肝椗（sem1 gon1 ding3）造句：“个仔係我个心肝椗嚟，为咗佢戒烟戒酒都冇问题！” |
|
|
化骨龙（fa3 gued1 lung4） 造句：“屋企家下多咗件化骨龙，真係搞到我头都大埋！” |
|
|
|
对于自己屋企嗰位细蚊仔，唔少家长中意用“化骨龙”、“心肝椗”去称呼佢哋。呢啲咁生鬼嘅粤语词汇，大家听就听得多啦，唔知佢哋背后嘅故事你又知几多？各位“化骨龙”快啲嚟学嘢啦！ 彭琳、实习生 许家铃/文 彭琳/图 等等、许家铃/模特 老积 lou5 jig1 “老积”係指一个人成熟老练，言行举止、所作所为都达到咗超乎自身年龄嘅阶段。“老积”和“招积”相差一个字，但係意思就好唔同！喺词性方面，“招积”偏向贬义，有自吹自擂、装模作样嘅意思，同“认叻”嘅意思相近。广府人会用“老积”去形容早熟嘅细路，而家啲细蚊仔睇得多电视又成日上网，细细个就超班学大人讲话。细蚊仔间中扮下“老积”都几得人钟意，但係太过“招积”就冇人钟意啦！ 精叻 zeng1 leg1 喺广东话当中，“精”形容聪明、机灵，例如“精乖”，係指聪明乖巧；而“叻”係有能干、有本事嘅意思，“叻仔”、“叻女”都係用嚟赞你有本事。“精叻”即係“精”同“叻”嘅结合，可以用嚟形容一个人既聪明又能干。你哋日日喺屋企搞搞震，搞到阿爸阿妈咁激气，揾日做返个听教听话嘅小朋友，氹下佢哋高兴啦！ 发狼戾 fad3 long1 lai6 坊间写法有好多，例如“发郎戾”、“发啷厉”，但“发狼戾”先是本字，因为有古文出处印证——《辞源·狼戾》（修订本）里记：“以狼性形容凶残。”佢係指突然扭曲事实、戾横折曲、蛮横无理咁发脾气嘅举动。“狼戾”呢个词，喺古时就已经存在，“狼”性格凶狠、蛮不讲理，“戾”就係形容唔正常嘅蛮横。“戾”字亦係多音字，写作“戾气”、“ 暴戾”嘅时候，就读成leu6。同“发烂苴”相比，“发狼戾”更加野蛮，而“发烂苴”就相对暴力。 吟噆 ngem4 cem3 呢个词广府人会用嚟形容人哋长气、讲嘢啰嗦，大家成日讲，但未必识写！“吟”呢个字係多音字，“吟谮”里面读成ngem4，如果係“吟诗”就读yem4。“谮”意思係坏话嘅。两个字合埋一齐，字面意思係数落人哋嘅缺点咁解，到后来，词义衍生咗，就用嚟形容口水多过茶嘅人。喺广府话入面，啰嗦嘅人仲可以用“谮气”嚟形容。阿爸阿妈有时吟谮两句，其实都係想啲仔女可以听入耳，唔想听长篇大论，大家记得唔好咁曳啦。 化骨龙 fa3 gued1 lung4 广府人每次劏生鱼之前，都会先将佢挞落地，原来同“化骨龙嘅传说有关。”传说以前嘅生鱼，有一类係有脚嘅，如果畀人误食，佢体内嘅骨头会融化成血水，所以叫佢做“化骨龙”。呢种生鱼只要被猛挞喺地下，就会伸出四只脚，可以避免误食。小朋友嘅食量比较大，咩都食得落肚，以前嘅广府人就用连骨都可以融化嘅“化骨龙”嚟比喻佢哋。而家仲会用“化骨龙”形容细路仔精力充沛，家长们少啲精力都搞佢哋唔掂啊！ 心肝椗 sem1 gon1 ding3 广府人俗语有话“心肝椗，蜜糖埕”，用于代指最疼锡嘅小朋友。“心肝椗”中嘅“椗”，本字係 “蒂”，即瓜果同枝蔓嘅相连处。“蒂”本身应该读成 dei3，但就被后人转读成ding3，结果注音时就写成“椗”。“椗”同“碇”嘅意思相同，指绑住船嘅石墩或铁锚。“蒂”係瓜果输送营养上不可或缺嘅一部分，同理，心肝上嘅“蒂”亦都意义非凡。
