|
|
|
|
|
|
|
|
|
|
|
|
|
|
|
|
|
|
|
|
|
|
|
|
唔知你有冇发现，广东人对数字特别敏感。你以为係因为自细收租得来嘅天赋异禀？其实係因为粤语中数字出现嘅频率实在太高啦！喺趣怪嘅粤语中，简单数字一样都好有讲头！ 陈祉伶/文 秦丽莹/图 郭玮、黄蕾/模特 鬼五马六 guei2 ng5 ma5 lug6 旧时认为初五、初六分别係牛日、马日。呢两天去地藏庙去拜牛头马面，总会令人觉得蒙有一层神秘古怪嘅色彩。所以鬼五马六可以形容人嘅行为古怪荒诞，让人捉摸不透。后面逐渐演变成讽刺、批评意味，形容人油滑、不正经，亦可以指污七八糟的东西。 造句：你搞到个头鬼五马六咁，因住吓亲啲细蚊仔啊。 坐定粒六 Zo6 ding6 neb1 lug6 “坐定”乃係古汉语的遗留，表肯定之意，例见于《西游记》第十四回：“这个老母，坐定是那个观世音!”“粒六”则源于一种叫做“掷牛六”嘅游戏，即各自掷一粒骰子，然后睇睇边个嘅点数大。最大係六，如果掷得六点，当然係有赢冇输。所以后来广府人就将“坐定粒六”比喻稳操胜券，做某事有绝对把握。 造句：阿强平时咁勤力，今年优秀员工奖坐定粒六啦！ 乱噏廿四 lün6 ngeb1 ya6 séi3 广东人好经常用“乱噏廿四”嚟形容人胡说八道。“乱噏”就係指胡乱说话，咁点解一定係“廿四”呢？有种讲法係，廿四为三八相乘所得，暗指“三八”，即喜欢搬弄是非嘅“八婆”。而另一种较文艺嘅解释则指，“廿四”指廿四史，係中国古代历朝撰写嘅二十四部史书的总称，被视作正统史书，旧时有讲古佬喜欢随口胡编历史故事，乱引廿四史吸引注意。 造句：你咪信佢喺度乱噏廿四啦，件事都唔係佢讲嘅咁 二仔底 yi6 zei2 dei2 出自一种叫“拖沙蟹”的扑克游戏，每人共发牌5张，其中一张底牌盖住为暗牌，其余为明牌，当中最细嘅牌係两点，广州话叫“二仔”。后来大家用“二仔底”比喻底子差，实力弱。一般底牌唔好时就应该退出游戏，但有啲人希望下一张係好牌，就会拼死跟上，企图迷惑对方。所以有“二仔底，死跟”比喻人虚张声势或只係模仿别人嘅作为。 造句：就佢咁嘅二仔底，再学两年都唔及你啦！ 二打六 yi6 da2 lug6 呢个词出自“赌番摊”，番摊嘅摊盘一般分开为四块，“一”对住庄家，“二四”对两边，“三”係庄家对面。六减四等于二，六加二就等于两个四，而二四就坐侧面，非正中间，所以好多时会用到“二打六”来形容嗰啲无关紧要嘅人物。亦有说法指，“打”係加嘅意思，二加六係八，过去八两只相当于半斤，所以有不够格、水平低、未够斤两之意。 造句：升职加人工？几时轮得到我呢啲二打六呢。 四四六六 séi3 séi3 lug6 lug6 呢个词来源于宋代，当时官府贵家举行宴会，设有“四司六局”负责统筹酒席，分工精细，专业明确，大小事物都安排得有条不紊。而粤语嘅“四”文读係“试”音，粤剧演唱时仍读此音，好似口语中“四正”嘅“四”亦读‘试”音。“试”与“司”音近，“六”与“局”同韵、同调，读音相似，所以就成咗“四四六六”，形容办事干练，处事得当，条理清晰。 造句：有矛盾唔使咁唠嘈，大家坐低四四六六拆掂佢。
