|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
郭玮/文 品牌官网/图 虎年到！虎虎生威、龙精虎猛、如虎添翼……除咗将带“虎”字嘅吉祥话常挂嘴边，识饮识食嘅广州人，当然唔会错过各种“虎”字美味！可能“生猛如虎”冲击味蕾，又可以似春风“虎”面温柔诱惑。快跟住Color胃口大开，食“虎”中“虎”，做人上人啦！ 脆口：牙齿交响乐 香脆可口嘅小零食几时都咁吸引人，作为膨化零食嘅“虎牙脆”更加如是。因为造型呈现尖尖嘅三角形，好似老虎啲牙齿咁，逐粒摆入口就“脆”味非常，嫌唔过瘾可以一把倒入口中大啖嚼，咸香脆爽，令人欲罢不能。而且仲有烧烤、牛肉、孜然等等唔同风味，食极都唔厌。如果咁多味嘅虎牙脆都满足唔到你，可以试下由粟米制成嘅“米老虎”。佢保留咗玉米颗粒原有嘅清甜可口，特殊工艺炮制后又赋予佢酥脆口感，enjoy牙齿嚼到咯咯声快感嘅你，一定唔好错过呢两款“脆”味零食。 怀旧：舌尖的童年味 如果觉得脆口嘅小零食太费牙，以下嘅美味可能更啱你。“虎皮蛋糕”承载着童年嘅味道，蛋香四溢又稍微烟韧嘅“虎皮”，汇合绵软香滑嘅奶油夹心蛋糕，双重口感交杂嘅体验，衍生出一种令人愉悦饱腹嘅满足感。时代变迁，但舌尖对“怀旧”味道嘅眷恋从来唔会消退。来自潮汕嘅“老虎蛋”係一种用椰丝制成嘅糕点，咬落甜而不腻，有阵阵麦芽糖味，外酥里嫩仲晓拉丝有嚼头，感觉就好似食紧椰子糖咁。为咗顺应后生仔嘅口味追求，“老虎蛋”仲开始推出朱古力味嘅新品，传统crossover新潮，啱嗮追求新鲜感嘅朋友。 重口：味蕾轰炸机 追求“重口味”嘅朋友，可以埋嚟睇下。“老虎菜”係一种北方酱菜，睇落就有少少似我哋平时食开嘅榨菜，作为一种用酱料腌到入晒味嘅酱菜，爽口得嚟又好下饭，拌面、送饭、夹馒头都好啱使。如果唔中意呢啲“咸咸湿湿”嘅酱菜重口，可以试下“黑老虎”俾你嘅视觉冲击！颜色鲜艳、外形扎实嘅佢又叫“恶魔果”，一瓣瓣嘅果肉聚成一个球体，睇落十足恶魔杀红眼时嘅高能感觉。除咗可以用嚟酿酒，成熟嘅果实仲可以直接食用，清甜多汁，味道上有啲似释迦，或者係熟透嘅山竹。 刺激：喉咙大挑战 中意食辣条类零食嘅朋友，应该试下“龙虎斗”。“龙虎斗”係一种豆制素肉，辣椒香油渗透到佢嘅每一丝纹理入面，咬落弹牙够味，酥酥麻麻嘅感觉从牙龈延伸到大脑，上头醒神，真係有老虎都可以打低几只嘅势头。如果想更加醒神，大家唔好错过俄罗斯嘅虎头酒，佢集合咗好多药材精华泡制，男士、女士饮都好补身，不过因为酒精度数较高，千祈唔好贪杯。
