|
|
|
|
|
|
|
|
|
|
|
|
|
|
|
|
|
|
|
|
|
|
|
|
话咁快Color 就19岁啦，一直以来，Color团队带住大家搜罗各种各样新奇趣怪嘢，体验美食、玩意、打卡地……唔知你又跟住我哋玩咗几多咧？趁住生日，可乐君特别邀请到糖妹担任Color玩乐体验官，今期由佢跟住《可乐生活》，带大家暴走潮人窦，体验广州新粤潮！ 郭玮/文 黄芷晴、秦丽莹/图 荔湾 Chok爆老西关 旧楼新玩 嚟到充满西关风情嘅荔湾区，咪以为呢度只有“老古董”，改建翻新之后嘅永庆坊已经成为潮人最爱打卡嘅宝地之一！骑楼古建筑里面係潮流冷饮，青砖墙内有网红打卡点，仲可以去李小龙祖居体验下功夫武学氛围，永庆坊内仲会定期摆设市集，原创小物应有尽有。外地旅客嚟到呢度，可以直观感受到广府文化底蕴嘅魅力，本地后生仔女嚟呢度亦能体验到传统和潮流结合的混搭新意，集合吃喝玩乐于一体嘅永庆坊，已成为係现代潮人嘅必拣选项。不畏酷暑嘅体验官糖妹一到步，即刻开启营业模式，摆pose影靓相，忙里偷闲随手get杯冰爽靓啡，疯玩一轮之后仲大嗌未够喉。 趁热“搞毛线” 除咗大热景点永庆坊，其实仲有唔少宝藏小店藏于荔湾区各条街巷，Color之前就帮大家发掘过唔少有意思嘅玩乐点，上期教大家Tufting手工艺嘅“织个毛毛”工作室都喺呢度。“陀枪”减压咁过瘾，糖妹睇到都心喐喐，话要趁热玩一玩！选定图案之后，佢都唔洗老板娘帮手，自给自足就係画布描起边。咪睇佢人仔细细咁，其实力量好惊人，摞起毛线枪十分架势堂，未打几枪就被老板大赞有天份！上次糖妹参加羊城晚报策划嘅非遗文化体验活动，Color就已经发现佢动手能力超强，今次“搞毛线”又惊艳到大家。连糖妹都忍唔住嚟突突突嘅Tufting，你难道仲未心喐吗！ 海珠 治愈社区行 七彩童话梦 近日，一批老旧社区大变身，吸引咗唔少潮人慕名前来打卡，海珠区晓西社区正係其中一个。呢度嘅市井小卖部可以同潮牌新店和谐共处，逛街打卡嘅新新人类同乘凉下棋嘅街坊老人互不打扰，酷爆古着店同硬核小食店相隔唔远，偶尔路过嘅小花猫，令略显静局嘅小区充满生机，好适合烦嚣城市人嚟度过休闲嘅下班时光，又啱初来乍到嘅旅人感受繁华城市嘅宁静。紫色门面嘅café、画成苹果嘅神秘小店、纯色外墙内里花哩碌嘅小铺头……个性特色的街铺设计，随处可见嘅壁画，无需购物饮食，静静散步都会get到惊喜，令糖妹又一次影心大动，微笑、大笑，随性展露真性情，快门每帧留下嘅都係佢最亮丽嘅瞬间。 原创有品味 各有特色嘅宝藏小店，係晓西社区吸引人嘅一大亮点。好似主打原创手工包包嘅Clly，就係社区里的明星店铺之一，店面唔算大但係内有乾坤。精致玲珑好啱夏天嘅耳钉耳环，大细各异材质唔同款色都好特别嘅手工包包，仲有点衬都好睇嘅靓裙靓衫……呢度简直就係女仔嘅dream store。贪靓嘅糖妹由入门就开始忍唔住手，试孭手袋、比划衣裙，老板娘亦热情满分帮佢搭配，笑言下个出show嘅造型都已经安排好晒。呢间原创包包店嘅商品，大部分都係老板亲手打造，件件都係独一无二！
