朱主爱：粤住粤有味道

　　来自马来西亚嘅创作歌手“小草”朱主爱，大大话话都喺广州生活咗3年啦。由初初嘅人生路不熟，到依家可以自己去四围wet，穿街走巷逛菜市场，小草已经升呢成为半个“广州潮人”，慢慢融入呢座城市啦。

　　郭玮/文、图

 

 

　　粤式生活技能满分

　　粤语文化係广府文化嘅精髓，朱主爱嚟咗广州咁耐，梗係要学翻几句傍身。基本嘅问候语，好似“早晨”“食咗饭未”“早唞”等，其实已经满足唔到好学嘅小草啦。中意四围wet嘅佢甚至自学咗，点样用粤语喺shopping、买餸时发动“知悭识俭”技能。买生果时同老细social下，咁样先有机会快速get到边啲货最靓；问完价要识杀价，主动出击先有“着数”……呢啲粤式生活技能，小草已经用到炉火纯青。

　　今次，小草趁住同识饮识食嘅“味成年阿辉”辉哥仔一起逛街市买餸，仲趁机学咗好多“盏鬼粤语”：原来茄子粤语叫矮瓜，释迦喺广东又叫番鬼荔枝，折耳根就叫鱼腥草……get到新知识点嘅小草忍唔住偷偷练习，小小口音显得特别可爱甜美，连菜摊嘅老板都被冧到主动去零头、打个折俾佢。嚟咗广州咁耐，广州人亲切又热情，随和嘅街坊、热心嘅陌生人，都令小草觉得呢座城市好有人情味，粤式生活真係“粤”住“粤”有味道。

 

 

 

 

 

　　轻松搵到家嘅味道

　　毕竟仲係离乡别井、一人在外打拼，总会有思乡嘅时候。呢啲时候，佢就会想食一种“家嘅味道”。今次佢要下厨煮嘅“马拉咖喱鸡”，就係佢念念不忘嘅“家乡味”。洋葱、姜片、红葱头手动舂碎，加入香料制作而成嘅咖喱酱，再同新鲜鸡肉一齐烹煮。每样食材应该如何调配用量？小草跟住心中嘅家乡味道，煮菜嘅时候就有咗一个衡量嘅标准，每次下厨时嘅心情变化，也成为咗呢道餸嘅甜辣咸淡度。

　　呢道菜有小草对家乡记忆嘅回味，亦係佢融入广州生活嘅一个见证。喺汇聚全国各地食材嘅广州，各种调料、食材都可以揾到，就算冇完全一样嘅材料，都可以轻而易举咁揾到“替代品”，小草煮菜嘅时候就不怕“巧妇难为无米之炊”。随手可得嘅食材，随时可以食到家乡菜，令小草觉得留喺广州特别美好。除咗咖喱鸡之外，娘惹菜、豆浆鸡等等都係佢家乡嘅美味，得闲嘅时候，佢就去会买齐食材番嚟，自己煮番几味。小草话，佢喺广州过得好好，同时，挂住家乡嘅心一直都在，好好生活，期待春暖花开嘅时候，与家乡亲友相聚。