|
|
|
广州西关嘅濑粉用米浆为汤底，以浓稠软糯著称，相信大家由细食到大。而喺中山三乡镇，都有一种濑粉，以粉质韧滑爽口而远近驰名，迷倒好多食客！今次《UP在湾区之港见粤闻》，有靓“熊”出没，一起去觅食！Color搵埋老友记胡鸿钧，带大家沉浸式感受三乡濑粉嘅魅力。 郭玮/文、图 “濑”出长寿与团圆 三乡濑粉，係广东中山三乡镇嘅传统名吃，始于清代嘉庆年间。“三乡濑粉”原名其实係“三乡攋粉”，因为粉条係用手“攋”出来嘅。而“又圆又长”嘅特色，也让三乡濑粉有一家团圆又人人长寿嘅好意头。三乡濑粉的粉质韧滑爽口，种类有汤濑、捞濑、焖濑等，汤濑自然最讲究汤底，鲜甜浓郁嘅月婆鸡汤同爽滑粉条搭配，就最合适。三乡濑粉嘅美味，吸引咗好多大湾区食客慕名而来，自上世纪八十年代以来，中山市有关食品部门就设厂制作干濑粉出口，以供三乡旅外同胞和外地旅客食用，三乡濑粉便成为广东五大名牌米粉食品之一。 自己喐手会更和味 曾经热衷于整甜品嘅熊君，知道自己有机会可以学习三乡濑粉呢门手艺之后，表示好开心、好兴奋。其实，制作濑粉就只有粘米粉同生粉两种原材料，将呢两种简单常见嘅食材按比例混合，加上滚水调和，充分搅拌之后，就係制作濑粉需要嘅粉浆啦。非遗传承人张师傅话，倒入滚水嘅温度一定要够，咁先可以将粉渌熟，师傅们係经过长时间嘅磨炼，先习惯到如此高温，所以喺制作过程中，濑粉初哥“熊君”都被不停提醒，要小心唔好焫亲。经滚水渌熟后嘅粉浆，要搅拌至绵滑嘅流体，倒入底部好多窿窿嘅濑粉榨里面，然后濑出粉条。雪白嘅粉浆流入滚水之后瞬间凝固，丝丝分明嘅粉条随著水花飘荡，睇起身真係好诱人！最后，要将熟透嘅濑粉条，浸落用黄芪、当归、鸡肉等材料熬制而成嘅月婆鸡汤，粉条吸满汤汁，暖胃又补身。大把quota嘅“熊君”，美味当前就不顾形象，捧起大碗试咗味先，如果大家都想品尝一下“熊君同款”，记得嚟三乡镇探个究竟啦。 传统美味多到食唔嗮 除咗三乡濑粉之外，三乡嘅茶果都係当地好出名嘅传统美味，仲已入选咗非物质文化遗产。馅料丰富嘅菜角，烟韧有嚼头嘅豆捞，咸香惹味萝卜糕……款色多、造型靓，咸甜皆可任君选择，除咗逢年过节，日常作为茶点享用亦非常适合，大家都会用来款待亲朋好友。“熊君”呢趟中山之旅，试咗好多传统美食，粉丝见状都忍唔住用自己嘅地道家乡美味引诱佢去玩：东莞茅根粥、汕尾咸茶、荔湾艇仔粥……“熊君”都大赞广东美食多，真係令佢食指大动、好想试！ Color提示 《UP在湾区之港见粤闻》会继续带大家学非遗、品美食、玩转非遗手艺，如果想知下次轮到边位大咖带大家搞搞新意思，记得关注我哋啦！
